Адвокат шү венсең 10-июл адвокатларни тутқун қилиш вәқәсини тәкшүрүшни тәләп қилди

Мухбиримиз меһрибан
2015-07-31
Елхәт
Пикир
Share
Принт

31-Июл җүмә күни бейҗиңлиқ адвокат шү венсең, хитай хәлқ қурултийи, сиясий кеңиши, дөләт ишлири кабинети, юқири хәлқ тәптиш мәһкимиси қатарлиқ орунларға торда очуқ хәт елан қилип, 10-июл адвокатларни тутқун қилиш вәқәсини тәкшүрүшни тәләп қилди.

Кишилик һоқуқ тор бекитиниң 31-июлдики хәвиридә дейилишичә, адвокат шү венсең очуқ хетидә, хитай җамаәт хәвпсизлик министирлиқиниң пүтүн мәмликәт бойичә кишилик һоқуқ адвокатлирини кәң-көләмдә тутқун қилиш һәрикитини әйиблигән. У мундақ дегән: «җ х министирлиқи 9-июл кечидә башлиған пүтүн мәмликәт бойичә адвокатларни кәң-көләмдә тутқун қилиш һәрикитидә 10-июл әтигәнгичә 100дин артуқ адвокатни бирла вақитта тутқун қилди. 10 Нәччә күн ичидила 240 тин артуқ адвокат тутқун қилинип сорақ қилинди, 100 дин артуқ пуқра сақчиханиға чақиртилип сорақ қилинди. Бу адвокатларниң тутқун қилиниш сәвәби ениқланмай, уларниң җинайити сотта бекитилмәй туруп, һөкүмәт таратқулиридин мәркизи телевизийә истансиси, хәлқ гезити қатарлиқлар бу адвокатларниң аталмиш «җинайи җавабкарлиқи»ни үстигә алғанлиқини кәң тәшвиқ қилди. Мән өз намимдин бу хәтни елан қилип, һөкүмәт орунлириниң 10-июл адвокатларни тутқун қилиш вәқәсини тәкшүрүп бир тәрәп қилишини тәләп қилимән.»

Мәлум болушичә, 7-айниң ахириғичә пүтүн хитай бойичә тутқун қилинған кишилик һоқуқ адвокатлири 240 тин ашқан. Хәлқара кишилик һоқуқ тәшкилатлири вә ғәрб демократик дөләтлири бу қилмишни әйибләп,хитай даирилирини бу адвокатларни вә тутқун қилинған кишилик һоқуқ паалийәтчилирини қоюп беришкә чақирған болсиму, әмма хитайниң һөкүмәт таратқулири мақалә елан қилип «америка қатарлиқ ғәрб дөләтлири кишилик һоқуқ мәсилисини дәстәк қилип, җуңгониң ички ишлириға қопаллиқ билән арилашти» дәп әйиблигән иди.

Пикирләр (0)
Share
Толуқ бәт