Из-дерәксиз ғайиб болған адвокат җяң тйәнйоңниң ақивити кишилик һоқуқ органлирини әндишигә салмақта

Мухбиримиз ирадә
2016-12-01
Елхәт
Пикир
Share
Принт

Бүгүн, хоңкоң вә тәйвәндики кишилик һоқуқ органлири бирләшмә баянат елан қилип, хитай һөкүмитини из-дерәксиз ғайиб болған кишилик һоқуқ адвокати җяң тйәнйоң мәсилисидә әйиблиди.

Улар, 1-декабир күни елан қилған баянатида, бейҗиң сақчи даирилириниң җяң тйәнйоң аилисиниң униң йоқап кәткәнликини қайта-қайта мәлум қилишиға қаримай, һәрикәткә өтмигәнликини тәнқид қилиш билән биргә, униң йоқап кетишидә һөкүмәт даирилириниң қоли болуши мумкинчиликиниму оттуриға қойған.

Баянат қилғучилар йәнә хәлқара җамаәтни хитайдики кишилик һоқуқ паалийәтчилириниң ғайиб қилиниш мәсилисигә диққәт қилишқа чақирған.

Җяң тйәнйоң 21‏-ноябир күни чаңша шәһиригә шу җайдики қамақханида тутуп турулуватқан кишилик һоқуқ адвокати шйе яңниң аилисидикиләрни зиярәт қилғили барған болуп, у қайтип келиш үчүн пойизиға олтуруштин бурун аяли билән алақиләшкән. Бирақ, шуниңдин кейин униң из-дерики болмиған. Җяң тйәнйоң илгири нурғун сәзгүр сиясий делоларниң адвокатлиқини үстигә елип, даң чиқарған кишилик һоқуқ адвокатлириниң бири. У, шундақла хитай даирилириниң 2009‏-йилидики «5‏-июл үрүмчи вәқәси» дин кейин, вәқәгә қатнашқан дәп қаралған уйғурларни кәң-көләмлик сотлишини тәнқид қилған иди.

Җяң тийәнйоң аилисидикиләр униң хитай җамаәт хәвпсизлик тармақлири тәрипидин мәхпий һалда елип кетилгән болуши мумкинликидин гуманлиниватқан болуп, кишилик һоқуқни көзитиш тәшкилати, вә хәлқара кәчүрүм тәшкилати қатарлиқ нурғун кишилик һоқуқ органлири хитай һөкүмитини җяң тийәнйоңниң ақивити һәққидә тәрәпсиз, ениқ мәлумат беришкә чақирмақта.

Пикирләр (0)
Share
Толуқ бәт