Америкидики юқири дәриҗилик мутәхәссисләр хитайниң америкаға қарши «соғуқ уруш» қозғаватқанлиқини әскәртмәктә

Мухбиримиз қутлан
2018-07-23
Елхәт
Пикир
Share
Принт

Америка мәркизий ахбарат идарисиниң бир нәпәр юқири дәриҗилик мутәхәссиси өткән җүмә күни таратқуларниң зияритини қобул қилғанда хитайниң нөвәттә америкиға қарши «соғуқ уруш» қозғаватқанлиқини әскәрткән.

Бирләшмә агентлиқниң 23-июлдики хәвиригә қариғанда, америка мәркизий ахбарат идариси шәрқий асия ишлири мәркизиниң муавин ярдәмчи директори майкол коллин колорадо штатида өткүзүлгән бир йиғинда хитайниң йеқиндин буян америкиға қарши «соғуқ уруш» елип бериватқанлиқидин агаһландуруш бәргән. У мундақ дегән: «шуниси ениқки, улар бизгә қарши бир мәйдан соғуқ уруш қозғаватиду. Бу соғуқ уруш әйни вақитта америка билән сабиқ советлар иттипақи оттурисида йүз бәргән соғуқ урушқа охшимисиму, әмма ениқлима җәһәттин у йәнила соғуқ уруштур.»

Майкол коллин хитайниң җәнубий деңиздики һәрбий кеңәймичилики вә территорийә тәлипини өз маһийити билән русийәниң 2014-йили қирим йерим арилини ютувелишиға охшатқан. 

Америка мәркизий ахбарат идарисиниң юқири дәриҗилик мутәхәссиси майкол коллиниң хитай һәққидә америкини агаһландуруши өткән чаршәнбә күни америка федератсийә 

Тәкшүрүш идарисиниң директори кристофер райниң хитай тәһдити тоғрилиқ қилған сөзидин кейинки йәнә бир қетимлиқ агаһландуруш икән. Америка федератсийә тәкшүрүш идарисиниң директори кристофер рай өткән һәптә «җасуслуққа қарши нуқтидин сөзлигәндә, хитай америка үчүн әң хәтәрлик тәһдит» дегән иди.

Америка дөләт ишлири министирлиқиниң шәрқий асия вә тинч окян ишлириға мәсул ярдәмчи секретари сузан торнтон ханимму хитайдин америкиға келиватқан йошурун хәвпләрни агаһландуруп мундақ дегән: «америка университетлиридики миңлиған хитай оқуғучилири вә гуруһлириниң түрлүк намлардики паалийәтлириниң америка үчүн йошурун хәвп туғдуруватқанлиқини техиму көп авам һес қилмақта.»

Мәлумки, иккинчи дуня уруши ахирлашқандин кейин америка башчилиқидики ғәрб демократик лагери билән сабиқ советлар иттипақи башчилиқидики коммунизм лагери оттурисида йерим әсир давамлашқан «соғуқ уруш» вәзийити шәкилләнгән. 1989-Йили «берлин теми» ниң өрүлүши, 1991-йили сабиқ советлар иттипақиниң йимирилиши билән «соғуқ уруш» дәври ахирлашқан иди. Һалбуки, америкиниң юқири дәриҗилик мутәхәссислириниң хитайниң нөвәттә америкиға қарши елип бериватқан бир қатар һәрикәтлириниң дәриҗисини «соғуқ уруш» аталғуси билән сүпәтлиши америка-хитай оттурисидики тиркишишниң йеңи бир дәвргә қәдәм қойғанлиқидин дерәк беридикән.

Пикирләр (0)
Share
Толуқ бәт