Хитай компартийиси хитай асаси қануниға өзгәртиш киргүзүш һәққидә музакирә елип бармақчи

Мухбиримиз шөһрәт һошур
2017-12-28
Елхәт
Пикир
Share
Принт

Шинхуа агентлиқиниң хәвәр қилишичә, келәр айниң 11‏-күнидин 13‏-күнигичә хитай компартийиси хитай асаси қануниға өзгәртиш киргүзүш һәққидә бир музакирә йиғини ачмақчикән. Хәвәрдә музакирә темилиридин бириниң парихорлуққа қарши қанун лайиһиси икәнлики билдүрүлгән, әмма музакирә темисиниң буниң билән чәклинидиғанлиқи яки чәкләнмәйдиғанлиқи билдүрүлмигән.

Ройтерс агентлиқиниң бүгүнки бу һәқтики хәвиридә, келәр йили март ейида хитайниң парихорлуққа қарши қанун лайиһисиниң «хәлқ қурултийи» намидики қорчақ парламентта мақуллинидиғанлиқи, мәзкур музакириниң әнә шу қурултайға қарита бир тәйярлиқ икәнлики тилға елинған.

Көзәткүчиләрниң қаришичә, хитай компартийисиниң парихорлуққа қарши шоари 1980‏-йилларда башланған вә ши җинпиң дәврдә бир қисим әмәлий қәдәмләр бесилған болсиму, әмма мәсилини омумйүзлүк өзгәртәлигән яки йилтизидин һәл қилишқа җүрәт қилалиған әмәс. Хитай көзәткүчилиридин хупиң бир мақалисидә, хитайда компартийә рәһбәрликидики бир партийә түзүми ағдурулмиғичә, хитай асаси қануниға киргүзүлгән һәрқандақ бир өзгүрүшниң парихорлуқни түгитәлмәйдиғанлиқини оттуриға қойған.

Вашингтонда яшаватқан уйғур көзәткүчи учқунҗан әпәнди, нөвәттә хитайда «миллий територийәлик аптономийә қануни» йерим әсирдин буян қуруқ қәғәз һалитидә туруватқан болса, йеңидин түзүлгән яки өзгәртилгән парихорлуққа қарши қанунниңму әмәлий бир ролиниң болмайдиғанлиқини илгири сүрди.

Пикирләр (0)
Share
Толуқ бәт