Xitay dölitining "Tughulghan küni" ge Uyghurlarning közidin nezer

Muxbirimiz eziz
2019-10-02
Élxet
Pikir
Share
Print

Xitayda xitay xelq jumhuriyiti qurulghanliqining 70 yilliqi we ularning bu jeryanda qandaq atalmish "Shanliq tereqqiyat" larni qolgha keltürgenliki tebrikliniwatqanda Uyghurlarning mezkur "Tughulghan kün" ge bashqiche qarashta ikenliki dunyaning diqqitini qozghidi. Ular bu heqtiki ehwallarni omumlashturup "Uyghurlarning bayanliri 'parqirighanning hemmisi altun emes' dégen hékmetni yene bir qétim namayan qildi" dédi.

"Zimistan" zhurnilining 1-öktebir sanigha bésilghan rus in'gramning bu heqtiki maqaliside mushu mesililer nuqtiliq muhakime qilinidu. Aptorning qarishiche, xitay hökümiti özlirining "Tughulghan küni" ning 70 yilliqini tebriklep qeshqer kochilirida sériq ejdihani jewlan qilduruwatqanda, shuningdek özlirining 1949-yili Uyghurlarni "Fé'odallarning zulumi" din xalas qilghanliqini teshwiq qiliwatqanda bu jezbidar sheherning axirqi sülketlik menzirisi közlerdin yütüshke yüzlen'gen.

Maqalida körsitilishiche, xitay hökümiti Uyghurlarning ürümchi, turpan, korla qatarliq sheherlerning kochilirida "Jungxu'a, men séni söyimen" dégendek qizil naxshilarni qandaq ishtiyaq bilen éytidighanliqini teshwiq qilish arqiliq Uyghurlarning xitay hökümitidin qandaq minnetdar boluwatqanliqini ispatlimaqtiken. Aptor bu heqte toxtilip: "Nöwette üch milyon Uyghur lagérgha qamalghan bolup, qizil naxsha éytmisa lagérgha baridighan qorqunchluq teqdir ularni buningdinmu köp qizil naxshilarni éytishqa mejburlimaqta" dep körsitidu.

Aptorning diqqitini qozghighan yene bir nuqta, xitay hazir xelq'araliq sorunlardimu ötken 70 yilda özlirining Uyghurlargha qandaq ghemxorluq qilip kelgenlikini teshwiq qilmaqtiken. Bolupmu xitay hökümitining iqtisadiy ilmeklirige ilinip qalghan ottuz nechche dölet xitayning Uyghurlargha qaratqan siyasetlirini qollap bayanat élan qilghandin kéyin, xitayning tashqi ishlar ministiri wang yi yéqinda birleshken döletler teshkilatida Uyghurlar heqqide mexsus söz qilghan. U sözide hazir qanchilik Uyghurgha birdin meschitning toghra kélidighanliqini pesh qilish arqiliq, bu sanning xelq'aradiki islam döletlirining sewiyesidinmu halqip ketkenlikini tekitligen.

Aptor mushu ehwallarni omumlashturup "Meyli béyjing qandaq shekildiki yalghanlarni éytmisun, u haman heqiqet bilen robro bolghanda reswa bolmay qalmaydu" deydu.

Toluq bet