Хитайниң түркийәдики баш әлчиси «18‏-март университети» ниң уйғур алимлирини тәклип қилғанлиқиға наразилиқ билдүргән

Мухбиримиз әркин
2019-09-09
Елхәт
Пикир
Share
Принт

Хитайниң түркийәдә турушлуқ баш әлчиси диң ли түркийәдики чанаққәлә «18‏-март университети» да өткүзүлгән «дуняға мәшһур әсли түрк алимлар йиғини» ға ғәрб әллиридики бәзи уйғур тәтқиқатчилириниң тәклип қилинип, доклат бәргүзүлгәнликигә наразилиқ билдүргән.

Чанаққәлә 18‏-март университетиниң өткән һәптә өткүзгән мәзкур паалийитигә америка массачуситс технологийә институтиниң ген тәтқиқатчиси доктор майсәм мутәлипова, америка аләм бошлуқи идарисиниң оптика инженери доктор әркин сидиқ, шиветсарийәдики юмшақ детал инженери доктор абдушүкүр абдурешит, австралийәдики мустәқил тәтқиқатчи доктор мәмтимин әла, дуня уйғур қурултийи иҗраийә комитети мудири өмәр қанат вә муавин рәиси пәрһат муһәммиди қатарлиқлар тәклип қилинип доклат бәргән.

Түркийәдики «хәвәр нида» намлиқ торниң билдүрүшичә, хитайниң түркийәдики баш әлчиси бу вәқә мунасивити билән түркийә һөкүмитигә наразилиқ билдүргән у, йиғинда доклат бәргән уйғур мутәхәссислирини «террорчи» дәп әйиблигән. Хәвәрдә, хитай баш әлчисиниң бу наразилиқни қачан вә қайси шәкилдә билдүргәнлики тилға елинмиған болсиму, лекин униң кичиккинә ишларни, уйғурларға алақидар һәрқандақ демократик инкасни һөкүмәткә шикайәт қилишни бир хил адәткә айландурувалғанлиқи илгири сүрүлгән.

Хәвәрдә баян қилинишичә, хитай әлчиханиси түркийәдики идарә-җәмийәт вә шәһәрлик һөкүмәтләрниң паалийәтлиригә уйғурларни тәклип қилишиға кашила чиқирип, уларға «министирлиқларға шикайәт қилимиз», «әрдоғанға дәймиз» дәп тәһдит салмақтикән. Хәвәрдә, бәзи бюкратларниң бу тәһдитләргә баш егип, өзрә тилигәнлики вә буниңдин кейин еһтият қилишқа вәдә бәргәнлики тәнқидлинип, бу кишиләрниң хитай әлчиханисиға «буниң ички ишлиримизға қол тиққанлиқ болидиғанлиқини билмәмсиз?» дәп җаваб берәлмәйватқанлиқи тәкитләнгән. Мәзкур йиғинда майсәм мутәлипова «зор өлчәмдә DNA топлаш билән мәҗбур ички әза көчүрүшниң мунасивити», әркин сидиқ «йеңи планетиларни байқиғучи аләм телескопи», доктор абдушүкүр абдурешит «зор өлчәмлик компютер булут техникиси» дегән темиларда доклат бәргән.

Пикирләр (0)
Share
Толуқ бәт