Xitayning türkiyediki bash elchisi "18‏-Mart uniwérsitéti" ning Uyghur alimlirini teklip qilghanliqigha naraziliq bildürgen

Muxbirimiz erkin
2019-09-09
Élxet
Pikir
Share
Print

Xitayning türkiyede turushluq bash elchisi ding li türkiyediki chanaqqel'e "18‏-Mart uniwérsitéti" da ötküzülgen "Dunyagha meshhur esli türk alimlar yighini" gha gherb elliridiki bezi Uyghur tetqiqatchilirining teklip qilinip, doklat bergüzülgenlikige naraziliq bildürgen.

Chanaqqel'e 18‏-mart uniwérsitétining ötken hepte ötküzgen mezkur pa'aliyitige amérika massachusits téxnologiye institutining gén tetqiqatchisi doktor maysem mutelipowa, amérika alem boshluqi idarisining optika inzhénéri doktor erkin sidiq, shiwétsariyediki yumshaq détal inzhénéri doktor abdushükür abduréshit, awstraliyediki musteqil tetqiqatchi doktor memtimin ela, dunya Uyghur qurultiyi ijra'iye komitéti mudiri ömer qanat we mu'awin re'isi perhat muhemmidi qatarliqlar teklip qilinip doklat bergen.

Türkiyediki "Xewer nida" namliq torning bildürüshiche, xitayning türkiyediki bash elchisi bu weqe munasiwiti bilen türkiye hökümitige naraziliq bildürgen u, yighinda doklat bergen Uyghur mutexessislirini "Térrorchi" dep eyibligen. Xewerde, xitay bash elchisining bu naraziliqni qachan we qaysi shekilde bildürgenliki tilgha élinmighan bolsimu, lékin uning kichikkine ishlarni, Uyghurlargha alaqidar herqandaq démokratik inkasni hökümetke shikayet qilishni bir xil adetke aylanduruwalghanliqi ilgiri sürülgen.

Xewerde bayan qilinishiche, xitay elchixanisi türkiyediki idare-jem'iyet we sheherlik hökümetlerning pa'aliyetlirige Uyghurlarni teklip qilishigha kashila chiqirip, ulargha "Ministirliqlargha shikayet qilimiz", "Erdoghan'gha deymiz" dep tehdit salmaqtiken. Xewerde, bezi byukratlarning bu tehditlerge bash égip, özre tiligenliki we buningdin kéyin éhtiyat qilishqa wede bergenliki tenqidlinip, bu kishilerning xitay elchixanisigha "Buning ichki ishlirimizgha qol tiqqanliq bolidighanliqini bilmemsiz?" dep jawab bérelmeywatqanliqi tekitlen'gen. Mezkur yighinda maysem mutelipowa "Zor ölchemde DNA toplash bilen mejbur ichki eza köchürüshning munasiwiti", erkin sidiq "Yéngi planétilarni bayqighuchi alem téléskopi", doktor abdushükür abduréshit "Zor ölchemlik kompyutér bulut téxnikisi" dégen témilarda doklat bergen.

Toluq bet