Уйғур дияриға йөткәп келингән хитай әмәлдариниң вәзиписи айдиңлашти

2019-02-27
Елхәт
Пикир
Share
Принт

Йеқинда хитайниң җилин өлкиси чаңчүн шәһириниң сабиқ партком секретари ваң җүнҗеңниң уйғур аптоном райониға йөткәп келиништики сәвәби айдиңлашқан.

Униң икки һәптә аввал туюқсиз аптоном районлуқ парткомниң даимий әзалиқиға йөткәп келиниши һәр хил гуманларни қозғиған иди.

Бәзиләр униң уйғур аптоном районлуқ партком секретари чен чүәнгониң орниға олтуруши мумкинликини илгири сүргән иди. Лекин хоңкоңдики «җәнубий хитай әтигәнлик почтиси» гезитиниң 27‏-феврал хәвәр қилишичә, ваң җүнҗең уйғур аптоном районлуқ сиясий-қанун комитетиниң секретари җу хәйлунниң вәзиписини өткүзүвалған. У 25‏-феврал күни сиясий-қанун комитетиниң омуми йиғиниға риясәтчилик қилған. Җу хәйлун бу йил 1‏-айда уйғур аптоном районлуқ хәлқ қурултийиниң муавин мудирлиқиға йөткилип, униң орни бош қалған иди.

Көзәткүчиләрниң қаришичә, хитай һөкүмитиниң җу хәйлунни сияси-қанун сепидин йирақлаштуруп, униң орниға ваң җүнҗеңни йөткәп келиши уни хәлқараниң көзидин йирақ тутушни мәқсәт қилған болуши мумкин икән.

Җу хәйлун 2 милйондәк уйғур, қазақ вә башқа мусулман хәлқләрниң йиғивелиш лагерлириға қамилиши вә из-дерәксиз ғайиб болушида асаслиқ җавабкарларниң бири дәп қарилип, америка һөкүмитиниң җазалиши тәләп қилиниватқан шәхс. Америка дөләт мәҗлисиниң әзалири өткән йили президент трампқа хәт йезип, униңға ембарго қоюшни тәләп қилған иди.

«Җәнубий хитай әтигәнлик почтиси» гезитиниң хәвиридә тәкитлинишичә, ваң җүнҗеңниң вәзиписи уйғур районида партийәниң мутләқ рәһбәрликигә капаләтлик қилиш икән. У 25‏-феврал өткүзүлгән йиғинда «партийәниң сиясий-қанун сепидики мутләқ рәһбәрликигә капаләтлик қилиш, партийә мәркизи комитетиниң шинҗаңни башқуруш истратегийәсини қәтий иҗра қилиш» ни тәкитлигән.

«Җәнубий хитай әтигәнлик почтиси» гезитиниң билдүрүшичә, көзәткүчиләр ваң җүнҗең хитайниң уйғур районидики қаттиқ контроллуқ сияситидә һечқандақ өзгириш пәйда қилмайду, дәп қарайдикән.

Пикирләр (0)
Share
Толуқ бәт