Хитай қанун күнидә бейҗиңға барған әрздарлар тутқун қилинди

Мухбиримиз меһрибан
2016-12-06
Елхәт
Пикир
Share
Принт

Радийомизға кәлгән учурлардин мәлум болушичә, 4-декабир «хитай қанун күни»дә тәхминән 2000 дәк әрздар бейҗиңдики дөләтлик әрзийәт идариси алдида топлинип намайиш қилғанда бир түркүм әрздарлар тутқун қилинған.
Сичүәндин кәлгән әрздарларниң билдүрүшичә, бейҗиң сақчилири улар билән биллә кәлгән 16 нәпәр әрздарни «җәмийәтни қалаймиқан қилди» дегән баһанидә тутқун қилип, сичүән өлкисиниң бейҗиңда турушлуқ иш беҗириш орниға солап қойған.

Әрздарларниң билдүрүшичә, 4-декабир хитай қанун күнидә бейҗиңда намайиш қилған әрздарлар арисида йәнә хейлоңҗаң, шаңхәй, җилин қатарлиқ җайлардин кәлгән әрздарлар вә тийәнҗиндин кәлгән һәрбий сәптин мәҗбурий чекиндүрүлгән офетсер-әскәрләрму бар болуп, улар әрзийәт идариси алдида 1000 парчидин артуқ вәрәқә тарқитип, наразилиқини ипадилигән. Бу сәвәбтин уларму тутқун қилинип, тәвәлики ениқланғандин кейин, өз өлкә, шәһәрлиридин кәлгән сақчилар яки һөкүмәт хадимлириға тапшуруп берилгән.

Хитайда йеқинқи йиллардин буян һөкүмәткә нарази болғучиларниң пайтәхт бейҗиңға берип әрз қилиши көпәйгән. Даириләр гәрчә әрздарларниң бейҗиңға келип әрз қилишиниң алдини елиш һәққидә җайларға җиддий буйруқ чүшүрүп, мәсилиләрни йәрликтә һәл қилишни тәләп қилған болсиму, әмма бейҗиңға келип әрз қилидиғанлар барғанчә көпәйгән. Әрздарларниң билдүрүшичә, болупму хитайда һөкүмәт тәрипидин бәлгиләнгән муһим хатирә күнлири, байрамлар вә хәлқаралиқ йиғин мәзгилидә чәтәл мухбирлириниң диққитини тартиш үчүн бейҗиңға келип әрз қилғучилар нисбәтән көп болған.

Пикирләр (0)
Share
Толуқ бәт