Xitay qanun künide béyjinggha barghan erzdarlar tutqun qilindi

Muxbirimiz méhriban
2016-12-06
Élxet
Pikir
Share
Print

Radiyomizgha kelgen uchurlardin melum bolushiche, 4-dékabir "Xitay qanun küni"de texminen 2000 dek erzdar béyjingdiki döletlik erziyet idarisi aldida toplinip namayish qilghanda bir türküm erzdarlar tutqun qilin'ghan.
Sichüendin kelgen erzdarlarning bildürüshiche, béyjing saqchiliri ular bilen bille kelgen 16 neper erzdarni "Jem'iyetni qalaymiqan qildi" dégen bahanide tutqun qilip, sichüen ölkisining béyjingda turushluq ish béjirish ornigha solap qoyghan.

Erzdarlarning bildürüshiche, 4-dékabir xitay qanun künide béyjingda namayish qilghan erzdarlar arisida yene xéylongjang, shangxey, jilin qatarliq jaylardin kelgen erzdarlar we tiyenjindin kelgen herbiy septin mejburiy chékindürülgen ofétsér-eskerlermu bar bolup, ular erziyet idarisi aldida 1000 parchidin artuq wereqe tarqitip, naraziliqini ipadiligen. Bu sewebtin ularmu tutqun qilinip, teweliki éniqlan'ghandin kéyin, öz ölke, sheherliridin kelgen saqchilar yaki hökümet xadimlirigha tapshurup bérilgen.

Xitayda yéqinqi yillardin buyan hökümetke narazi bolghuchilarning paytext béyjinggha bérip erz qilishi köpeygen. Da'iriler gerche erzdarlarning béyjinggha kélip erz qilishining aldini élish heqqide jaylargha jiddiy buyruq chüshürüp, mesililerni yerlikte hel qilishni telep qilghan bolsimu, emma béyjinggha kélip erz qilidighanlar barghanche köpeygen. Erzdarlarning bildürüshiche, bolupmu xitayda hökümet teripidin belgilen'gen muhim xatire künliri, bayramlar we xelq'araliq yighin mezgilide chet'el muxbirlirining diqqitini tartish üchün béyjinggha kélip erz qilghuchilar nisbeten köp bolghan.

Toluq bet