Béyjingda eydiz wirusi yuqumdarliri namayish qilip hökümetke naraziliq bildürdi

Muxbirimiz erkin
2013-11-28
Élxet
Pikir
Share
Print

Alahazel birer yüzdin artuq eydiz wirusi yuqumdari charshenbe küni béyjing wangfujinda yighilish ötküzüp xitay hökümitining eydiz siyasiti we jem'iyetning kemsitishige naraziliq bildürgen. Hökümetning özlirige tölem tölishini telep qilghan.

Namayishchilar seyshenbe küni xitay sehiye ministirliqining aldida omumi xor éytip namayish qilghan idi. Bu weqe derhal chet'el axbarati, xitay jem'iyiti we hökümitining diqqitini qozghighan.

Xitaydiki eydiz yuqumdarlirining hoquqini qoghdash organliridin béyjing eyjishing tetqiqat ornining bildürüshiche, da'iriler derhal saqchi küchlirini yötkep kélip, charshenbe küni wangfujingda toplan'ghan namayishchilarni tarqitiwetken.

Bu jeryanda saqchilar bir qisim eydiz namayishchilirini tutup, saqchi aptomobiligha sélip élip ketken bolsimu, biraq xelq ishlar ministirliqining etrapigha élip bérip qoyup bergen.

Namayishchilar charshenbe küni wangfujingda yighilishtin burun xitay xelq ishlar ministirliqining aldida yighilish ötküzgen. Mezkur weqe 1-dékabir yétip kélidighan dunya eydiz küni harpisida yüz bergen idi. Namayishchilar yene yerlik da'irilerning xitay merkizi hökümiti chiqarghan 26‏-nomurluq höjjetni ijra qilishini telep qilghan.

26‏-Nomurluq höjjette, yerlik hökümetlerge eydiz bimarlirigha her ayda 600 som yardem puli bérish, ata-anisi eydizde ölgen balilarning turmushigha kapaletlik qilish buyrulghan.

Xitay da'iriliri ikki yil awwal xitay boyiche 780 ming ademning eydiz wirusidin yuqumlan'ghanliqini élan qilghan idi. Biraq, xitay herbiy doxturxanisining sabiq doxturi gaw yawjyéning ilgiri sürüshiche, xitayda 10 milyon'gha yéqin adem eydiz wirusidin yuqumlan'ghan.

Pikirler (0)
Share
Toluq bet