Хитайда 1-февралдин башлап бир түркүм йеңи бәлгилимиләр йолға қоюлидикән

Мухбиримиз қутлан
2017-02-04
Елхәт
Пикир
Share
Принт

Хитай һөкүмәт таратқулириниң хәвиригә қариғанда бу йил 1-февралдин башлап хитай һөкүмити тор бихәтәрлики, карханиларниң мәбләғ селинмиси, йемәклик вә дориларни назарәт қилиш қатарлиқ саһәләрдә бир йүруш йеңи бәлгилимиләрни йолға қойидикән.

Хәлқ ториниң билдүришичә, интернет торини ишлитиш җәһәттики йеңи бәлгилимә башқа барлиқ бәлгилимиләрниң алдиға қоюлған болуп, даириләрниң бу җәһәттики позитсийәси интайин қаттиқ икән.

Игилинишичә, телеграф кәспи херидарлири торға кириш келишими имзалиғанда уларниң һәқиқий нам ишлитиши тәләп қилинидикән. Йәни телеграф кәспий тиҗарәтчилири херидарлар билән торға кириш келишими түзгәндә херидарлардин кимликини чиқириш, һәқиқий салаһийәт учури билән тәминләшни тәләп қилидикән.

Хитай һөкүмити чиқарған бу йеңи бәлгилимә чәтәлләрдики көзәткүчиләр билән сиясий анализчиларниң диққитини қозғиған. Хәлқардики кишилик һоқуқ тәшкилатлири билән кишилик һоқуқ паалийәтчилири хитайниң дунядики интернет қолланғучилар әң көп болған бир дөләт болушиға қаримай, торға болған контроллуқниң йилдин-йилға күчийип бериватқанлиқини илгири сүрмәктә.

Уйғур көзәткүчиләр, хитай йеңидин йолға қойған бу бәлгилиминиң әң алди билән уйғур ели вә тибәткә охшаш сиясий җәһәттин сәзгүр районлардики йәрлик аһалиларда еғир сиясий бесим һес қилдуридиғанлиқини тәкитлимәктә.

Пикирләр (0)
Share
Толуқ бәт