Хитайдики «ит гөши йейиш байрими» хәлқара җамаәтчиликниң қаттиқ тәнқидигә дуч кәлгән

Мухбиримиз қутлан
2015-06-22
Елхәт
Пикир
Share
Принт


Томуз яз мәзгилидә хитайниң җәнубий районидики йүлин наһийәсидә «ит гөши йейиш байрими» ниң тәнтәнә қилиниши хәлқара җәмийәтниң диққитини қозғиған.

Мәлум болушичә, хитайниң җәнубий өлкилиридә һәр йили томуз яз мәзгилидә «ит гөши йейиш байрими» өткүзүлидикән. Байрам мәзгилидә хитай ресторанлири омумйүзлүк ит, мүшүк қатарлиқ инсанлар билән әң йеқин туридиған һайванларни өлтүрүп, уларниң гөшидин түрлүк таамлар һазирлайдикән.

Хәлқарадики һайванлар һоқуқини қоғдаш тәшкилатлири шуниңдәк мутләқ көп сандики хәлқара җамаәтчилик хитайдики бу хил адәттин ташқири йемәклик адитидин қаттиқ биарамлиқ һес қилған. Чүнки хитай қатарлиқ интайин аз сандики дөләтләрдин башқа дуняда омумйүзлүк һалда ит, мүшүк қатарлиқ һайванларни өлтүрүш яки йейиш «ғәйрий - инсаний қилиқ» дәп қарилип кәлмәктә.

Хитайниң гваңши җуаңзу аптоном районидики йеза - сәһраларда бу йиллиқ «ит гөши йейиш байрими» да аз дегәндә миңдин артуқ итниң союлғанлиқи мәлум.

Йүлин наһийәсидики ресторан хоҗайинлири бу һәқтә чәтәл мухбирлириниң зияритини қобул қилип мундақ дегән: «ит гөши йейиш биздики бир йәрлик әнәнә. Униң йәрлик һөкүмәт билән алақиси йоқ.»

Хитайдики яң фамилилик бир ит қоғдиғучи өткән һәптә ахири юрти тийәнҗиндин җәнубтики йүлин наһийәсигә берип 7 миң сом пул һәҗләп 100 ит сетивалғанлиқини вә уларниң һаятини сақлап қалғанлиқини ашкара қилған.

Толуқ бәт