Хитай җасуслуқ оргининиң сабиқ башлиқи сотлиниду

Мухбиримиз әркин
2016-12-30
Елхәт
Пикир
Share
Принт

Хитай компартийәси җүмә күни хитай җасуслуқ оргининиң сабиқ башлиқи ма җйәнниң қанун тармақлириниң бир тәрәп қилишиға тапшурулғанлиқини елан қилди.

Ма җйән илгири хитай дөләт бихәтәрлик министирлиқиниң муавин министирлиқ вәзиписини атқурған иди. У, 2015‏-йили 1‏-айда вәзиписидин тохтитип тәкшүрүлүшкә башлиған. Ма җйән һазирқи қәдәр хитай җасуслуқ системисидин қанун тармақлириниң бир тәрәп қилишиға тапшурулған әң юқири дәриҗилик әмәлдар.

Хитай мәркизи интизам тәкшүрүш комитети җүмә күни елан қилған қисқа баянатида, униң партийәдин қоғлап чиқирилип, қанун тармақлириға тапшуруп берилгәнликини билдүрди. Хитай компартийәсиниң мәзкур парихорлуққа қарши туруш оргининиң қәйт қилишичә, ма җйән һоқуқини суйиистемал қилип, уруқ-туғқанлириниң тиҗари мәнпәәтигә чоғ тартқан, қанун органлириниң һәрикитигә дәхли-тәруз қилған вә пара алған.

Ма җйән сабиқ компартийә мәркизи сиясий қанун комитети секретари җу йүңкаңниң парихорлуқ вәқәсидин кейин хизмитидин тохтитип тәкшүрүлүшкә башлиған иди. Ройтерс агентлиқиниң билдүрүшичә, ма җйән қошумчә хитай дөләт бихәтәрлик министирлиқи 8‏-идарисиниң директори болуп, мәзкур идарә чәтәл җасуслуқ һәрикәтлиригә қарши турушқа, хусусән чәтәллик дипломат, содигәр вә мухбирларниң һәрикитини тәқиб қилишқа мәсул икән.

Пикирләр (0)
Share
Толуқ бәт