2018‏-Йили уйғур районида хитай карханилири партлаш характерлик көпәйгән

Мухбиримиз әркин
2019-01-11
Елхәт
Пикир
Share
Принт

2018‏-Йили уйғур аптоном район районида хитай карханилири партлаш характерлик көпийип, йеңидин оттура-кичик типлиқ 19 миң кархана пәйда болған.

Алақидар даириләрниң «мәркизи шәһәр истемалчилар гезити» гә билдүрүшичә, өткән йили 170 миң адәм бу карханиларда ишқа орунлашқан. Мәзкур учур хитай ширкәтлириниң уйғур районидики лагерларда завут-карханиларни қуруп, уйғур тутқунларни һәқсиз яки төвән иш һәққи билән кәң көләмлик мәҗбурий әмгәккә селиватқанлиқиға даир хәвәрләр кәң тарқиливатқан мәзгилдә елан қилинди.

Йеқинда бирләшмә агентлиқи «тәйда» намлиқ бир хитай ширкитиниң хотәндики бир лагерда завут қуруп, кийим-кечәк ишләпчиқарғанлиқи, униң мәһсулатиниң америкиға импорт қилинғанлиқини ашкарилиған. «Тәйда» ширкитиниң мәһсулатини импорт қилған америкидики баҗер намлиқ тәнтәрбийә кийимлири ширкити түнүгүн баянат елан қилип, уйғур районидики карханилар ишләпчиқарған мәһсулатларни импорт қилишни тохтатқанлиқини елан қилған. Буниң алдида италийәдики «зимистан» намлиқ диний әркинлик тори, бәзи хитай ширкәтлириниң завут-карханилирини ғулҗа наһийәсидә қурулған «җяфаң ишләпчиқириш бағчиси» ға йөткәп кәлгәнлики, лагердики тутқунларниң бу бағчидики карханиларда ишқа селиниватқанлиқини илгири сүргән.

«Мәркизи шәһәр истемалчилар гезити» ниң билдүрүшичә, йәрлик даириләр уйғур районида завут-карханиларниң шиддәтлик көпийишини ишқа ашурушта иқтисади байлиқ тәннәрхини чүшүрүш, уйғур елиниң җәнубидики 3 вилайәт, бир областта әмгәк зичлиқи юқири карханиларни тәрәққий қилдуруш қатарлиқ сиясәтләрни йолға қойған икән. Хитай даирилири 2017‏-йилниң башлиридин башлап уйғурларни кәң көләмлик йиғивелиш лагерлириға қамашқа башлиған. Шуниңдәк йәнә «ишләпчиқириш бағчилири» намидики йеник санаәт мәркәзлирини бәрпа қилип, нурғун тоқумичилиқ вә кийим-кечәк ширкәтлириниң завут-карханилирини бу бағчиларға йөткәп чиққан иди. «Мәркизи шәһәр истемалчилар гезити» ниң ашкарилишичә, даириләрниң 2019‏-йиллиқ пилани бу йил юқириқидәк әмгәк зичлиқи юқири завут-карханиларни давамлиқ көпәйтип, 100 миң адәмни ишқа орунлаштурушни ишқа ашуруш икән.

Уйғур кишилик һоқуқ тәшкилатлири нөвәттә 3 милйондәк уйғур, қазақ вә башқа мусулман милләтләрниң йиғивелиш лагерлирида тутуп турулуватқанлиқи, хитай даирилириниң уларни һәқсиз яки әрзан әмгәк күчи сүпитидә мәҗбурий әмгәккә селип, зор пайдиға еришиватқанлиқини илгири сүрүп кәлмәктә.

Пикирләр (0)
Share
Толуқ бәт