Xitay tashqi ishla ministiri myunxén bixeterlik yighinida lagérlarning mewjutluqini inkar qildi

Muxbirimiz erkin
2020-02-14
Élxet
Pikir
Share
Print

Xitay tashqi ishlar ministiri wang yi Uyghur rayonida 3 milyondek musulman qamalghan lagérlarning mewjutluqini inkar qilghan. Uning ilgiri sürüshiche, mezkur rayonda "Héchqandaq buzghunchiliq élip bérilmighan, shundaqla birmu jaza lagéri mewjut emes" iken. U bu sözlerni 13‏-féwral küni gérmaniye tashqi ishlar ministiri xeyku ma'as bilen ötküzgen axbarat yighinida qilghan.

Wang yi "Myunxén bixeterlik yighini" gha qatnishish üchün gérmaniyege kelgen idi. Yilda bir qétim échilidighan "Myunxén bixeterlik yighini" 14‏-féwral bashlan'ghan.

3 Künlük yighin'gha firansiye prézidénti makron, kanada bash ministiri trédo, amérika tashqi ishlar ministiri pompéyo, iran tashqi ishla ministiri muhemmet jawad zarif, xitay tashqi ishlar ministiri wang yi, sh a e t bash katipi stolténbérg qatarliq qatnashqan.

Bu qétimqi "Myunxén bixeterlik yighini" xitayni qaplighan "Wuxen wirusi" Uyghur aptonom rayonigha tarqilip, uning lagérlargha tarqilish xewpi xelq'ara tébbiy mutexessisliride qattiq endishe qozghawatqan mezgilde chaqirilghan idi.

"Amérika awazi" radi'osining xewer qilishiche, wang yi xeyku ma'as bilen ötküzgen axbarat yighinida muxbirlarning lagérlar heqqidiki so'aligha jawab bérip, "Dunyaning her qaysi jayliridin muxbirlarni, ammiwi teshkilatlarni jümlidin diplomatlarni shinjanggha bérip, tekshürüsh élip bérish we ziyaret qilishqa teklip qilduq. Her qaysi döletlerning oxshimighan nuqti'ineziri bolushi mumkin. Lékin bir nuqtini héchkim inkar qilalmaydu. U bolsimu héchkim birer jaza lagérini, héchqandaq bir buzghunchiliqni körüp baqmidi" dégen.

Uning ilgiri sürüshiche, jaza lagéri, bir milyon ademning tutqun qilinishi, dégenler pütünley "Ösek söz" hem "Saxta xewer" iken.

Xitay hökümiti ilgiri lagérlarning mewjutluqini pütünley inkar qilip, kéyinrek bu orunlarning "Kespiy terbiyelesh merkezliri" ikenlikini ilgiri sürgen. Xitay hökümiti pakistan, iran, bén'gal, misir, rusiye qatarliq döletlerning muxbir, diplomatlirini mezkur rayonda ziyaretke orunlashturghan bolsimu, lékin b d t kishilik hoquq kéngishi we gherb döletlirining bu rayondiki xalighan lagérda tekshürüsh élip bérish telipini izchil ret qilip kelgen idi.

Toluq bet