Андерс кор: «хитай һөкүмити инсан һәқлириниң ядролуқ принсиплириға һуҗум қиливатиду!»

Мухбиримиз әзиз
2019-01-29
Елхәт
Пикир
Share
Принт

Хитай һөкүмитиниң ташқи дуняға барғансери ашкара болуватқан йәнә бир йүзи униң инсан һәқлири саһәсидики дәпсәндичилик қилмишиниң сан җәһәттики көплүки вә характер җәһәттики қәбиһликидә әкс етиватқанлиқи мәлум. Америкидики тонулған сиясий анализчи, доктор андерс кор 29-январ күни «католик асия бирлики хәвәрлири» гезитидә елан қилған зор һәҗимлик мақалида дәл мушу мәсилиләр нуқтилиқ муһакимә қилиниду.

Андерс кор хитайниң нөвәттә инсан һәқлири җәһәттики дәпсәндичиликниң йеңи рекордини яратқанлиқини, буниң әң типик мисали сүпитидә икки милйончә уйғурниң «қайта тәрбийәләш лагери» вә «әмгәк лагери» ға қамалғанлиқини тилға алиду. Шуниңдәк пүткүл дуня бу хил җисманий хорлаш қилмишини әйибләватқанда хитай һөкүмитиниң һечқандақ хиҗил болмастин «биз җуңгочә алаһидиликкә игә инсан һәқлирини җари қилдуруватимиз» дәп мәйдисигә уруп йүргәнликини мәсхирә қилиду.

Апторниң қаришичә, 1948-йили җакарланған «дуня кишилик һоқуқ хитабнамиси» дики ядролуқ принсиплар әмәлийәттә дуняви мутәпәккурларниң, пәйласопларниң вә диний алимларниң нәччә миң йиллиқ тәпәккур дурданилирини асас қилған болуп, инсанниң тәбиәт ата қилған тәбиий һәқлирини қоғдашни түплүк нишан қилған. Һалбуки, хитай һөкүмити дөләтниң тәрәққияти вә игилик һоқуқни қоғдашни шәхсләрниң инсан һәқлирини һимайә қилишниң үстигә қоювалған. Шуниң билән биргә дуняға инсан һәқлириниң әң түп пиринсипини пайхан қилишниң үлгисини кеңәйтмәктә икән.

Андерс мақалисидә б д т ниң пуқравий җәмийәтни қоғдаш, һәрқайси дөләтләрниң инсан һәқлири җәһәттики мәсилилирини баһалаш, тинчлиқ бәрпа қилиш қатарлиқ мәҗбурийәтләрни үстигә алғанлиқини, әмма хитайниң бу әһвалларға әң зор дәриҗидә хилаплиқ қиливатқанлиқини баян қилип, «һазирқи пакитлардин қариғанда хитай һөкүмитини б д т дики инсан һәқлирини баһалаш вә иҗра қилиш хизмитидин қоғлап чиқириш керәк» дәп хуласә чиқириду.

Пикирләр (0)
Share
Толуқ бәт