Andérs kor: "Xitay hökümiti insan heqlirining yadroluq prinsiplirigha hujum qiliwatidu!"

Muxbirimiz eziz
2019-01-29
Élxet
Pikir
Share
Print

Xitay hökümitining tashqi dunyagha barghanséri ashkara boluwatqan yene bir yüzi uning insan heqliri sahesidiki depsendichilik qilmishining san jehettiki köplüki we xaraktér jehettiki qebihlikide eks étiwatqanliqi melum. Amérikidiki tonulghan siyasiy analizchi, doktor andérs kor 29-yanwar küni "Katolik asiya birliki xewerliri" gézitide élan qilghan zor hejimlik maqalida del mushu mesililer nuqtiliq muhakime qilinidu.

Andérs kor xitayning nöwette insan heqliri jehettiki depsendichilikning yéngi rékordini yaratqanliqini, buning eng tipik misali süpitide ikki milyonche Uyghurning "Qayta terbiyelesh lagéri" we "Emgek lagéri" gha qamalghanliqini tilgha alidu. Shuningdek pütkül dunya bu xil jismaniy xorlash qilmishini eyiblewatqanda xitay hökümitining héchqandaq xijil bolmastin "Biz junggoche alahidilikke ige insan heqlirini jari qilduruwatimiz" dep meydisige urup yürgenlikini mesxire qilidu.

Aptorning qarishiche, 1948-yili jakarlan'ghan "Dunya kishilik hoquq xitabnamisi" diki yadroluq prinsiplar emeliyette dunyawi mutepekkurlarning, peylasoplarning we diniy alimlarning nechche ming yilliq tepekkur durdanilirini asas qilghan bolup, insanning tebi'et ata qilghan tebi'iy heqlirini qoghdashni tüplük nishan qilghan. Halbuki, xitay hökümiti döletning tereqqiyati we igilik hoquqni qoghdashni shexslerning insan heqlirini himaye qilishning üstige qoyuwalghan. Shuning bilen birge dunyagha insan heqlirining eng tüp pirinsipini payxan qilishning ülgisini kéngeytmekte iken.

Andérs maqaliside b d t ning puqrawiy jem'iyetni qoghdash, herqaysi döletlerning insan heqliri jehettiki mesililirini bahalash, tinchliq berpa qilish qatarliq mejburiyetlerni üstige alghanliqini, emma xitayning bu ehwallargha eng zor derijide xilapliq qiliwatqanliqini bayan qilip, "Hazirqi pakitlardin qarighanda xitay hökümitini b d t diki insan heqlirini bahalash we ijra qilish xizmitidin qoghlap chiqirish kérek" dep xulase chiqiridu.

Toluq bet