Хитай ширкити өзбекистандики завут қурулуши үчүн зор мәбләғ салидиғанлиқини билдүргән

Мухбиримиз үмидвар
2017-09-03
Елхәт
Пикир
Share
Принт

Өзбекистан президенти шавкәт мирзияйефниң бу йил 5-айдики хитай зиярити җәрянида хитай билән өзбекистан арисида зор миқдардики сода-иқтисади, мәбләғ вә башқа саһәләргә аит келишимләр имзаланғандин кейин, хитай тәрәпниң өзбекистанға мәбләғ селишни актиплаштуриватқанлиқи ейтилмақта.

Буниң мисали сүпитидә хитайниң бир ширкити сәмәрқәнттә семонт вә әйнәк завутини қуруш үчүн бир йерим милярд доллар мәбләғ салидиғанлиқини билдүрүп, өзбекистан тәрәп билән келишим һасил қилған. «Өзбекистан хәвәрлири» агентлиқиниң бу һәқтики учуридин мәлум болушичә, хитайниң «CITI Holding Group Co.Ltd» Дәп аталған ширкити өзбекистанниң «умәр» қурулуш-ишләпчиқириш ширкити тәркибидики тармақ ширкәт билән һәмкарлишип, сәмәрқәнттә бирләшмә ширкәт қуруш һәмдә бирликтә семонт, қелин қурулуш әйнәклири ишләпчиқириш һәмдә қурулуш материяллирини ишләпчиқиридиған техника орунлирини қурушни пилан қилған. Хитай тәрәп бир йерим милярд доллар мәбләғ салидиғанлиқини билдүргән.

Оттура асия учур васитилиридин мәлум болушичә, хитай өзбекистанға қошна таҗикистанғиму көпләп мәбләғ селип, һәр хил завутларни қурмақта. Илгири хитай билән өзбекистан арисида тәбиий газ саһәсидики һәмкарлиқ келишими асасий орунда туратти. Нөвәттә өзбекистанниң хитайниң түрлүк саһәләр бойичә мәблиғини җәлп қилишқа киришкәнлики билдүрүлмәктә.

Пикирләр (0)
Share
Толуқ бәт