Хитай хәлқ қурултийиниң йиғини бейҗиңда башланди

Мухбиримиз үмидвар
2017-03-05
Елхәт
Пикир
Share
Принт


5-Март күни хитай хәлқ қурултийиниң йилда бир қетим ечилидиған йиғини бейҗиңда башланди.

Қурултайниң ечилиш мурасимиға хитай компартийиси сиясий бюросиниң йәттә нәпәр даимий һәйәт әзаси толуқ қатнашқан болуп, баш министир ли кечяң һөкүмәт хизмитидин доклат бәргән.

Б б с агентлиқиниң хәвәр қилишичә, или кечяң доклатида асаслиқи төт нуқтини тәкитлигән болуп, буниң ичидики муһимлиридин бири хитайниң иқтисадий тәрәққият мәсилиси болуп, у 2017-йили хитайниң иқтисадий өсүш сүритиниң 6.5 % Болуши пәрәз қилинған болсиму, әмма хитайниң йәнила дуняда иқтисад тәрәққият сүрити тез өсүватқан мәмликәт һесаблинидиғанлиқини билдүргән.

Америка авазиниң хәвиридә баян қилинишичә, ли кечяң нутқида көп қетим«ши җинпиң ядролуқидики партийә мәркизи комитети» дегән ибарини ишләткән. Икки күн алдидики сиясий кеңәш йиғинида, сиясий кеңәш рәиси йү җеңшеңму мәзкур сөзни көп қетим тәкитлигән иди.

Анализчилар, уларниң бу тәкитләшлирини ши җинпиңниң хитай компартийисиниң 19-қурултийида давамлиқ өз орнини сақлап қалидиғанлиқиниң бешарити дәп қаримақта.

Ли кечяң өз нутқида тәйвән мәсилисини тәкитләп, «һәр қандақ адәмниң һәр қандақ шәкилдә вә һәр қандақ намда тәйвәнни вәтәндин айрип чиқишиға қәтий йол қоймаймиз» дегән.

У хоңкоң мәсилисидә, «бир дөләттә икки хил түзүм», «хоңкоңлуқлар хонкоңни идарә қилиш»тин ибарәт «юқири дәриҗидики аптономийә сияситини давамлаштуридиғанлиқи»ни вә «хоңкоң мустәқиллиқиниң чиқиш йоли йоқлуқи»ни әскәрткән.

Пикирләр (0)
Share
Толуқ бәт