Xitay xelq qurultiyining yighini béyjingda bashlandi

Muxbirimiz ümidwar
2017-03-05
Élxet
Pikir
Share
Print


5-Mart küni xitay xelq qurultiyining yilda bir qétim échilidighan yighini béyjingda bashlandi.

Qurultayning échilish murasimigha xitay kompartiyisi siyasiy byurosining yette neper da'imiy hey'et ezasi toluq qatnashqan bolup, bash ministir li kéchyang hökümet xizmitidin doklat bergen.

B b s agéntliqining xewer qilishiche, ili kéchyang doklatida asasliqi töt nuqtini tekitligen bolup, buning ichidiki muhimliridin biri xitayning iqtisadiy tereqqiyat mesilisi bolup, u 2017-yili xitayning iqtisadiy ösüsh sür'itining 6.5 % Bolushi perez qilin'ghan bolsimu, emma xitayning yenila dunyada iqtisad tereqqiyat süriti téz ösüwatqan memliket hésablinidighanliqini bildürgen.

Amérika awazining xewiride bayan qilinishiche, li kéchyang nutqida köp qétim"Shi jinping yadroluqidiki partiye merkizi komitéti" dégen ibarini ishletken. Ikki kün aldidiki siyasiy kéngesh yighinida, siyasiy kéngesh re'isi yü jéngshéngmu mezkur sözni köp qétim tekitligen idi.

Analizchilar, ularning bu tekitleshlirini shi jinpingning xitay kompartiyisining 19-qurultiyida dawamliq öz ornini saqlap qalidighanliqining béshariti dep qarimaqta.

Li kéchyang öz nutqida teywen mesilisini tekitlep, "Her qandaq ademning her qandaq shekilde we her qandaq namda teywenni wetendin ayrip chiqishigha qet'iy yol qoymaymiz" dégen.

U xongkong mesiliside, "Bir dölette ikki xil tüzüm", "Xongkongluqlar xonkongni idare qilish"tin ibaret "Yuqiri derijidiki aptonomiye siyasitini dawamlashturidighanliqi"ni we "Xongkong musteqilliqining chiqish yoli yoqluqi"ni eskertken.

Toluq bet