Хитай саяһәтчи қәпәстики бир қара ейиқни етип өлтүргән

Мухбиримиз җүмә
2017-12-30
Елхәт
Пикир
Share
Принт

Бирмиға саяһәткә барған бир хитай пуқрасиниң қәпәстики бир қара ейиқни милтиқ билән етип өлтүргән син көрүнүши торға чапланғандин кейин күчлүк ғулғула қозғиған.

Әнглийәдин чиқидиған «күндилик мәктуплар» гезитиниң хәвәр қилишичә, етип өлтүрүлгән бу ейиқ асия қара ейиқи болуп, нөвәттә йоқилип кетиш тәһдитигә дуч кәлгән ейиқ икән. 

Хәвәргә қариғанда, бу вәқә бирминиң хитай билән чегрилинидиған вә өлкисидә йүз бәргән. Қара ейиқни атқан у хитай киши хитай ахбаратлириға ейиқниң әслидә етилиш алида турған бир ейиқ икәнликини, шуңа уни етиш рухситини йәрлик һөкүмәттин алғанлиқини вә бу ейиқини бир қизиқиш нуқтисидинла атқанлиқини билдүргән. 

Бу саяһәтчиниң ейиқни етиватқан көрүнүши 27-декабир хитайдики иҗтимаий таратқуларға чапланған вә қаттиқ наразилиққа сәвәб болған. 

Мәлум болушичә, бу филим шу саяһәтчиләр гурупписидики бирәйлән тәрипидин тартилған. Улар тартқан йәнә бир көрүнүштә өлтүрүлгән ейиқниң союлғанлиқи, ички әзалири парчиланғанлиқи, 4 данә ейиқ тапиниң кесилип бир йәргә дөвилинип қоюлғанлиқи хатирилигән. 

Хәвәрдә асия һайванат һоқуқини қоғдаш җәмийитидики доктор җил робинсонниң ейтқанлиридин нәқил елип көрситишичә, қара ейиқниң ички әзалири вә тапанлири хитайни өз ичигә алған асия әллиридә қанунсиз сетилидикән. 

У, мәзкур филимдики көрүнүшләргә қариғанда бу қара ейиқниңму қараңғу базарда сетилиш үчүн өлтүрүлгән болуши мумкинликини илгири сүргән.

Толуқ бәт