Көзәткүчиләр: хитай һөкүмитиниң сиясәтлири уйғур елидики террорлуқ вәқәлириниң сәвәбчиси

Мухбиримиз ирадә
2017-03-30
Елхәт
Пикир
Share
Принт

30-Март, австралийә дөләтлик университетиниң профессори майкил кларк «шәрқий асия мунбири» тәтқиқат орниниң тор бетидә мақалә елан қилип, хитай һөкүмитиниң уйғур елидә қаттиқ қоллуқ сиясәтләрни йүргүзүш арқилиқ өз қоли билән уйғур террорлуқини пәйда қилғанлиқини билдүрди.

У мулаһизисидә, уйғур елиниң тарихи вә истратегийилик орни қатарлиқ муһим сәвәбләр түпәйлидин хитай һөкүмитиниң уйғур елидә йүз бәргән һәрқандақ бир һәрикәткә қаттиқ қоллуқ билән инкас қайтурғанлиқини, болупму 2009-йилидики үрүмчи вәқәсидин кейин район вәзийитини алаһидә чиңитип, уйғур елини «сақчи дөлити» түзүми билән идарә қилғанлиқини, буниң нәтиҗисидә «ислам дөлити тәшкилати» қатарлиқ террор тәшкилатлириға бир қисим уйғурларниму қойниға алидиған бир шараит яритип бәргәнликини баян қилған вә «хитай һөкүмити 11-сентәбир вәқәсидин кейин уйғур елидә йүз бәргән вәқәләрни, һәқиқәтән мәвҗут яки әмәслики талаш-тартиш қилинидиған шәрқий түркистан ислам дөлити тәшкилатиға бағлиди һәм уларниң әлқаидә тәшкилати билән алақиси барлиқини илгири сүрди. Әмдиликтә хитай һөкүмити өзи «сақчи дөлити» сиясәтлири билән ахири берип, бир қисим уйғурларниң һәқиқәтән чәтәлләрдики тәшкилатлар билән алақә орнитишиға өз қоли билән шараит яритип бәрди» дегән.

Уйғур елиниң вәзийитини көзитиватқан нурғун мутәхәссисләр вә кишилик һоқуқ органлири бирдәк, хитай һөкүмитиниң уйғур елидики дәриҗидин ташқири еғир бесим сияситиниң райондики муқимсизлиққа вә зораванлиқ вәқәлиригә сәвәб болуватқанлиқини көрсәтмәктә.

Пикирләр (0)
Share
Толуқ бәт