Xitayda 2016-yili 2500 din artuq tor bet taqalghan

Muxbirimiz ümidwar
2016-12-18
Élxet
Pikir
Share
Print


Xitay metbu'atlirining ashkarilishiche, 2016-yili xitayda élip bérilghan "Tor tazilash" herikitide jem'iy 2500 din artuq tor bet taqiwétilgen.

Pütün xitay miqyasida élip bérilghan mezkur tor betler üstidin tekshürüsh we qanunsizliq sadir qilghan tor betlerni hem bloglarni taqash herikiti xitay döletlik "Sériqni tazilap, qanunsizliqqa zerbe bérish" ishxanisining biwasite qomandanliqida élip bérilghan bolup, "Xelq tori"ning mezkur organdin éniqlishiche, 2016-yili, 11-ayning axirighiche bolghan ariliqta üch milyon 270ming parche shehwaniyliqqa munasiwetlik we bashqa ziyanliq uchur éniqlap chiqilip, qanunsiz 2500 din artuq tor bet tekshürülüp, resmiy taqiwétilgen.

Emma, mezkur taqalghan tor betler terkibige Uyghurche tor betler kirgüzülgen-kirgüzülmigenliki melum emes.

Xewerde déyilishiche,,mexsus türde téngshün, beydu, shinglang qatarliq 360 din artuq her qaysi chong intérnét shirketliri üstidin tekshürüsh élip bérilghan.

Da'iriler bu qétimqi tor betlerge qaritilghan tazilash herikitide asasliqi shehwaniyliq qatarliq qanunsiz qilmishlargha zerbe bérishni nishan qilghan bolsimu, emma yenila qanun'gha xilap xewer tarqatquchi torlar üstidinmu tekshürgenliki we munasiwetlik orunlar bilen birliship, muhim xewer torlirigha qarita qattiq nazaret élip barghanliqini bildürgen.

"Xitay xewer tori"ning xewer qilishiche, bundaq pütün xitay boyiche élip bérilghan tor betlerni tekshürüsh we tazilash herikitide 2015-yil 4977 tor bet taqiwétilgen idi.

Merkizi washin'gtondiki Uyghur kishilik hoquq layihisi qatarliq organlarning doklatliri we dunya Uyghur qurultiyining melumatlirigha qarighanda, Uyghur diyardiki tor betlerge qaritilghan nazaret yildin yilgha éshiwatqan bolup, 2016-yili kontrolluq yene ashqan.

Mutexessislerning éytishiche, köp sandiki Uyghurche tor betler Uyghur tilidiki "Ulinish"namliq tor betler tizimlikidin qaldurulghan yaki échilmas bolup qalghan bolup, bu emeliyette melum sandiki Uyghur tor betlirining taqalghanliqini körsitidiken. Buningdin bashqa yene tor betlerdiki mezmunlargha bolghan kontrolluq téximu kücheytilgen bolup, ömerjan boz qir, tursunjan marshal qatarliq bir qanche tor yazghuchilirining tutqun qilin'ghanliqi ashkarilan'ghan idi.

Toluq bet