Washin'gton waqti géziti: "Korona wirusi xitayning wuxendiki bi'ologiyelik qorallar tejribixanisidin tarqalghan bolushi mumkin"

Muxbirimiz erkin
2020-01-27
Élxet
Pikir
Share
Print

"Wuxen wirusi" dégen nam bilen tonulup, dunyada qattiq endishe qozghighan sirliq öpke yallughi wirusining esli wuxendiki bir bi'ologiyelik qorallar tejribixanisi bilen alaqidar bolushi mumkinliki ilgiri sürüldi.

"Washin'gton waqti géziti" ning 26‏-yanwar ilgiri sürüshiche, haywanlardin tarqalghanliqi ilgiri sürülgen bu wirus esli xitayning wuxendiki bir mexpiy bi'ologiyelik tejribixana bilen chétishliq bolushi mumkin iken. "Washin'gton waqti géziti" ning obzorchisi bil gértisning namida élan qilin'ghan xewerde, isra'iliye armiyesining sabiq istixbarat emeldari daniy shohamning sözi neqil keltürülgen. Daniy shoham uzun yil xitayning bi'ologiyelik qorallar programmisi tetqiqati bilen shughullan'ghaniken.

Erkin asiya radiyosi ötken hepte wuxendiki bir téléwiziye istansisining 2015‏-yili bergen xewirini élan qilghan. Xewerde xitaydiki eng ilghar wirus tetqiqat orni bolghan "Wuxen wirilogiye instituti" tonushturulghanidi. Bil gértisning bildürüshiche, daniy shoham "Washin'gton waqti géziti" ge qilghan bu heqtiki sözide, "Bu orun xitayning asasliq bi'oximiyelik qorallar bazisi bolsimu, lékin uningdiki bezi tejribixanilar xitayning ‏(bi'ologiyelik qoralliri)ni tetqiq qilish, tereqqiy qildurush ishlirigha arilashqan bolushi mumkin" dégen. Lékin, bu uchurning rastliqi hazirgha qeder xitay da'iriliri teripidin delillenmidi. "Washin'gton waqti géziti" ning xewiride ilgiri sürülüshiche, xitay özlirining bi'ologiyelik qorallargha ige ikenlikini ret qilsimu, lékin amérika tashqi ishlar ministirliqining ötken yili élan qilghan doklatida uning bi'ologiyelik qorallarni mexpiy tereqqiy qilduruwatqanliqidin guman qilidighanliqi qeyt qilin'ghaniken. Melum bolushiche, nöwette xitayda 2835 adem bu wirus bilen yuqumlan'ghan, 81 adem ölgen. Lékin bezi xewerlerde xitayning heqiqiy sanni yoshuruwatqanliqi ilgiri sürülmekte.

Toluq bet