Таҗсиман юқумни йошурушида дуня сәһийә тәшкилатиниң җавабкарлиқини сүрүштүрүш тәләп қилинди

Мухбиримиз әркин
2020-04-03
Елхәт
Пикир
Share
Принт

Хитайниң вухәндә партлиған корона вируси юқумини йошурушида дуня сәһийә тәшкилатиниң җавабкарлиқини сүрүштүрүш, мәзкур тәшкилатниң ефийопийәлик рәһбири гәбрәйсусниң истепа беришини тәләп қилиш садалири күчәймәктә.

Америка җумһурийәтчи кеңәш палата әзаси рик скот 1-апрел баянат елан қилип, дуня сәһийә тәшкилатиниң хитай компартийәсиниң юқумни йошурушиға ярдәм қилғанлиқи, америка һөкүмити бу органниң юқумни йошурушта ойниған ролини тәкшүрүши керәкликини билдүргән.

Униң тәкитлишичә, америка дөләт мәҗлиси гуваһлиқ йиғини чақирип, дуня сәһийә тәшкилатиға бериватқан зор бәдәл пулини давамлиқ бериш-бәрмәсликни қарап чиқиши керәк икән. Шуниң билән бир вақитта америка кеңәш палата әзаси марта миксалий, дуня сәһийә тәшкилатиниң баш директори гәбрәйсусниң истепа беришини тәләп қилған. Униң 2-апрел америкадики «сиясәт» тор гезитигә билдүрүшичә, гәбрәйсус хитайниң корона вируси юқумини йошурушиға ярдәм қилған.

«Вашингтон көзәткүчиси» гезитиниң хәвәр қилишичә, дуня сәһийә тәшкилати йәнә японийәниң тәнқидлишигә учриған. японийәниң муавин баш вәзири таро асу 2-апрел японийә парламентида сөз қилип, «бу орун дуня сәһийә тәшкилати әмәс, хитай сәһийә тәшкилати, дәп атилиши керәк» дегән. Униң тәкитлишичә,

«Илгири у хитайда өпкә яллуғи юқуми йоқ, дәп чиң турмиған болса, кишиләр униңға қарита балдуррақ тәдбир алаттикән». Нөвәттә хитай өткән йили 11-айда байқалған вирусни йошуруп, юқумниң һазирқидәк дуняға ямришини кәлтүрүп чириш билән әйибләнмәктә.

Пикирләр (0)
Share
Толуқ бәт