Явропа парламенти хитайниң кишилик һоқуқ вәзийитидин, уйғур вә тибәтләрниң әһвалидин әндишә қиливатқанлиқини билдүрди

Мухбиримиз әркин
2015-12-18
Елхәт
Пикир
Share
Принт

Явропа парламенти, явропа иттипақниң хитай билән мунасивити һәққидики доклатини мақуллап, явропа иттипақини хитай билән террорлуқ, қанунсиз көчмәнләр, килимат өзгириши, дуня пул муамилә базирини тәртипкә селиш қатарлиқ мәсилиләрдә һәмкарлиқни күчәйтишкә чақирған.

Шуниң билән биргә, хитайниң кишилик һоқуқ вәзийитидин әндишә қиливатқанлиқини тәкитләп, хитайниң тибәтләргә тутқан муамилисини, уйғур мәдәнийитини чәткә қеқиштәк қаттиқ қол сияситини тәнқид қилған.

Явропа парламенти хитайдики паалийәтчиләр, адвокатлар, илмий хадим вә аммиви гуруһ вәкиллириниң әһвалидин әндишә қиливатқанлиқини билдүрүп, явропа иттипақини хитайниң иҗтимаий тәшкилатларни башқуруш қанун лайиһәсигә, тор бихәтәрлик қануниға наразилиқ билдүрүшкә чақирған.

Явропа парламентиниң илгири сүрүшичә, бу бәлгилимиләр пуқраларниң йиғилиш, сөз әркинликини чәкләп, хитайдики явропа карханилириға вә тәшкилатлириға пайдисиз тәсир көрситидикән.

Бу йил явропа иттипақи билән хитай мунасивәт қурғанлиқиниң 40 йиллиқи.

Явропа иттипақи-хитай мунасивәт доклати 16‏-декабир явропа парламентида авазға қоюлған. Доклатқа явропа парламентидики 554 әза қоллап аваз бәргән, 55 әза қарши аваз бәргән, 99 әза аваз бериштин ваз кәчкән.

Пикирләр (0)
Share
Толуқ бәт