Хитайниң чәтәлләрниң телефон алақә системисиға бөсүп кирип уйғурларни назарәт қилғанлиқи ашкариланди

Мухбиримиз ирадә
2019-09-05
Елхәт
Пикир
Share
Принт

Ройтерсниң хәвәр қилишичә, хитай һөкүмити үчүн ишләйдиған хаккерлар бир қисим дөләтләрниң телефон-учур алақә ториға бөсүп кирип, оттура асия вә шәрқий җәнубий асия дөләтлиридә саяһәт қиливатқан уйғурларниң һәрикитини назарәт қилған.

Ройтерс агентлиқиниң бу хаккерлиқ һуҗумлирини тәкшүрүватқан муһим мәнбәләрдин игилишичә, хитай һөкүмитигә бағлинишлиқ болған бир қанчә гуруппа хаккерлар түркийә, қазақистан, һиндистан, тайланд вә малайшия қатарлиқ дөләтләрниң телефон алақә системилириға бөсүп киргән. Уларниң қаришичә, юқиридики бу һуҗумлар хитай һөкүмитиниң юқири дәриҗилик дипломатлар вә чәтәл һәрбий әмәлдарлири қатарлиқ «юқири дәриҗилик шәхс» ләргә қаратқан кәң көләмлик интернет җасуслуқ һәрикитиниң бир парчиси болуш билән биргә, уйғурларниң һәрикитини назарәт қилиш униң әң муһим вәзиписи икән. 

Хитай хаккерларниң бу дөләтләрдики қайси телефон системилириға һуҗум қилғанлиқи ашкариланмиған. 

Тайланд вә һиндистан ройтерсниң бу һәқтики соаллириға җаваб қайтурушни рәт қилған. Бирақ, хитай ташқи ишлар министирлиқи ройтерсқа қайтурған инкасида юқиридики хаккерлиқ һуҗумлириниң өзи билән алақиси йоқлуқини илгири сүргән. 

Америка-исраилийә тор бихәтәрлики ширкитиниң тәтқиқатчиси амит сәрпир ройтерсқа қилған сөзидә, хитай хаккерларниң телефон системилириға һуҗум қилиш арқилиқ мәлум кишиниң телефон-учур алақилирини, у кишиниң орнини көрүп туруш билән биргә, шу киши вә униң әтрапидики достлириниң күн бойи қайси телефон алақә мунариға бағлинип турғанлиқини биләләйдикән. 

Техи икки күн алдида хитай хаккерларниң уйғурлар қоллиниватқан алма вә андроид телефонлириға суқунуп кирип, уларниң телефонлиридики учурларни оғрилиғанлиқи ашкариланғаниди. Хитай һөкүмитиниң чәтәлләрдики уйғурларни нишан қилған бу кәң көләмлик җасуслуқ һәрикити нөвәттә уйғурларниң диққитини қозғаватқан җиддий мәсилиләрниң бири болуп қалди.

Толуқ бәт