Xitayning chet'ellerning téléfon alaqe sistémisigha bösüp kirip Uyghurlarni nazaret qilghanliqi ashkarilandi

Muxbirimiz irade
2019-09-05
Élxet
Pikir
Share
Print

Roytérsning xewer qilishiche, xitay hökümiti üchün ishleydighan xakkérlar bir qisim döletlerning téléfon-uchur alaqe torigha bösüp kirip, ottura asiya we sherqiy jenubiy asiya döletliride sayahet qiliwatqan Uyghurlarning herikitini nazaret qilghan.

Roytérs agéntliqining bu xakkérliq hujumlirini tekshürüwatqan muhim menbelerdin igilishiche, xitay hökümitige baghlinishliq bolghan bir qanche guruppa xakkérlar türkiye, qazaqistan, hindistan, tayland we malayshiya qatarliq döletlerning téléfon alaqe sistémilirigha bösüp kirgen. Ularning qarishiche, yuqiridiki bu hujumlar xitay hökümitining yuqiri derijilik diplomatlar we chet'el herbiy emeldarliri qatarliq "Yuqiri derijilik shexs" lerge qaratqan keng kölemlik intérnét jasusluq herikitining bir parchisi bolush bilen birge, Uyghurlarning herikitini nazaret qilish uning eng muhim wezipisi iken. 

Xitay xakkérlarning bu döletlerdiki qaysi téléfon sistémilirigha hujum qilghanliqi ashkarilanmighan. 

Tayland we hindistan roytérsning bu heqtiki so'allirigha jawab qayturushni ret qilghan. Biraq, xitay tashqi ishlar ministirliqi roytérsqa qayturghan inkasida yuqiridiki xakkérliq hujumlirining özi bilen alaqisi yoqluqini ilgiri sürgen. 

Amérika-isra'iliye tor bixeterliki shirkitining tetqiqatchisi amit serpir roytérsqa qilghan sözide, xitay xakkérlarning téléfon sistémilirigha hujum qilish arqiliq melum kishining téléfon-uchur alaqilirini, u kishining ornini körüp turush bilen birge, shu kishi we uning etrapidiki dostlirining kün boyi qaysi téléfon alaqe munarigha baghlinip turghanliqini bileleydiken. 

Téxi ikki kün aldida xitay xakkérlarning Uyghurlar qolliniwatqan alma we andro'id téléfonlirigha suqunup kirip, ularning téléfonliridiki uchurlarni oghrilighanliqi ashkarilan'ghanidi. Xitay hökümitining chet'ellerdiki Uyghurlarni nishan qilghan bu keng kölemlik jasusluq herikiti nöwette Uyghurlarning diqqitini qozghawatqan jiddiy mesililerning biri bolup qaldi.

Toluq bet