Yawropa ittipaqining rehberliri xitayni wedisige wapa qilmasliqta eyiblidi

Muxbirimiz eziz
2020-06-23
Élxet
Pikir
Share
Print

Xitay hökümitining xelq'aradiki obrazi barghanséri selbiy tüs éliwatqanda yawropa ittipaqi özlirining xitay bilen bolidighan munasiwitide nurghunlighan wedilerning orundalmighanliqini epsusluq ichide eslep chiqti. "Jenubiy xitay seher géziti" ning 23 iyundiki xewiride bu mesile tepsiliy sherhilinip, ikki terepning otturisidiki munasiwetning kelgüsi tereqqiyati heqqide bezi pikirler otturigha qoyuldi.

Yawropa ittipaqining re'isi ursula léyan alahide tilgha alghan nuqtilar ikki terep otturisidiki dunya soda teshkilati arqiliq bir-birige meblegh sélish wediliridin tartip kilimat özgirishigiche bolghan sahediki kélishimlerni öz ichige alidiken. Emma bu wediler we kélishimlerdin ijra bolghanliri bekmu az iken. Bolupmu yéqinqi mezgilde yuqiri pellige chiqiwatqan xongkongdiki démokratiye namayishining basturulushigha bolghan naraziliqlar, kishilik hoquq sahesidiki depsendichilik, xitayning tor sahesidiki saxta uchur tarqitish qilmishliri qatarliqlar hemmidinmu bekrek diqqet merkizide bolmaqtiken.

Ursula xanim bu heqte söz qilip: "Yawropa ittipaqi bilen xitay otturisidiki munasiwet hazir eng zor xirislargha tolghan bir mezgilge toghra kéliwatidu. Bolupmu tor hujumigha qaraydighanla bolsaq buning nedin kéliwatqanliqini köreleymiz" dégen.

Melum bolushiche, yawropa ittipaqining xitay bilen bolghan munasiwiti bu yil may éyidin bashlap yiriklishishke bashlighan. Bolupmu yawropa ittipaqi xitayni "Sistémiliq reqib" dep békitkendin kéyin buninggha ulishipla otturigha chiqqan 5G téxnikasigha munasiwetlik mesililer buninggha chong tesir körsetken. Yawropa ittipaqigha eza döletlerdimu amérika hökümiti otturigha qoyghan xu'awéy shirkitini cheklesh chaqiriqigha awaz qoshush mesilisi heqqide küchlük munaziriler dawam qilmaqtiken. Yene bir yaqtin xitay hökümitining bu qétimqi tajsiman wirusi mezgilide yawropa ittipaqigha qarita "Maska diplomatiyesi" ni ishqa sélishi, amérikagha bolsa "Urushqaq böriler" sheklide eyibni bashqilargha artip qoyushqa urunush qilmishi tüpeylidin bu xil yiriklik téximu yuqiri pellige chiqmaqtiken.

Toluq bet