Хитайдики кишилик һоқуқ адвокатлири хәлқара мәҗбурий ғайиб қиливетилгәнләр күнини хатирилиди

Мухбиримиз меһрибан
2016-08-30
Елхәт
Пикир
Share
Принт

Хитайдики кишилик һоқуқ адвокатлиридин илгири уйғур зиялийси илһам тохтиниң адвокатлиридин лю шавйүән әпәнди твитер торида чақириқнамә елан қилип, хитайдики кишилик һоқуқ адвокатлириниң «30-авғуст хәлқарада мәҗбурий ғайиб қиливетилгәнләрни хатирилигәнликини билдүрди.

Бултур йүз бәргән адвокатларни тутқун қилиш вәқәсидин кейин, даириләр тәрипидин адвокатлиқ салаһийитидин еливетилгән лю шавйүән әпәнди чақириқнамисидә: «биз кишилик һоқуқ адвокатлири мәҗбурий ғайиб қиливетишниң зиянкәшликигә учриғанларни хатириләймиз. Һөкүмәт тәрипидин мәҗбурий ғайиб қиливетилгәнләрниң дерикини қилимиз, хәлқара җәмийәт вә һөкүмәтләрдин б д т ниң бу һәқтики бәлгилимилирини иҗра қилишни тәләп қилимиз» дегән.

2010-Йили 12-айниң 21-күни бирләшкән дөләтләр тәшкилати 65 ‏-қетимлиқ йиғинида 209-номурлуқ қарар мақуллап, 30-авғуст күнини «хәлқара мәҗбурий ғайиб қиливетилгәнләрни хатириләш күни» дәп бәлгилигән. 2011-Йилдин буян бу күн хатирилиниватқан болуп, б д т һәрқайси дөләт һөкүмәтлиридин мәҗбурий ғайиб қиливетилгәнләрниң һоқуқини қоғдаш әһдинамисини иҗра қилишни тәләп қилип кәлгән. 30 ‏-Авғуст б д т баш катипи пәнҗивен йәнә б д т ниң тор бекитидә мәхсус баянат елан қилип, мәҗбурий ғайиб қиливетилгәнләрниң һоқуқини қоғдашни тәләп қилған.

Хитай хәлқара таратқуларда мәҗбурий ғайиб қиливетилгәнләр әң көп дөләтләрниң бири дәп тәрипләнмәктә. 2009-Йили үрүмчидә йүз бәргән 5-июл вәқәсидә сақчилар тәрипидин тутқун қилинип, кейин из-дерики болмиған көплигән уйғурлардин 30 дин артуқ киши радийомиз тәрипидин ениқланған. Ундин башқа бултур 7-ай мәзгилидә йүз бәргән 300 дин артуқ адвокатни тутқун қилиш вәқәсидин буян, хитайда кишилик һоқуқ паалийәтчилири, әрздарлар вә уларниң адвокатлириниң туюқсиз ғайиб болуш вәқәлири барғанчә көпәйгән иди.

Пикирләр (0)
Share
Толуқ бәт