Xitaydiki kishilik hoquq adwokatliri xelq'ara mejburiy ghayib qiliwétilgenler künini xatirilidi

Muxbirimiz méhriban
2016-08-30
Élxet
Pikir
Share
Print

Xitaydiki kishilik hoquq adwokatliridin ilgiri Uyghur ziyaliysi ilham toxtining adwokatliridin lyu shawyüen ependi twitér torida chaqiriqname élan qilip, xitaydiki kishilik hoquq adwokatlirining "30-Awghust xelq'arada mejburiy ghayib qiliwétilgenlerni xatiriligenlikini bildürdi.

Bultur yüz bergen adwokatlarni tutqun qilish weqesidin kéyin, da'iriler teripidin adwokatliq salahiyitidin éliwétilgen lyu shawyüen ependi chaqiriqnamiside: "Biz kishilik hoquq adwokatliri mejburiy ghayib qiliwétishning ziyankeshlikige uchrighanlarni xatirileymiz. Hökümet teripidin mejburiy ghayib qiliwétilgenlerning dérikini qilimiz, xelq'ara jem'iyet we hökümetlerdin b d t ning bu heqtiki belgilimilirini ijra qilishni telep qilimiz" dégen.

2010-Yili 12-ayning 21-küni birleshken döletler teshkilati 65 ‏-qétimliq yighinida 209-nomurluq qarar maqullap, 30-awghust künini "Xelq'ara mejburiy ghayib qiliwétilgenlerni xatirilesh küni" dep belgiligen. 2011-Yildin buyan bu kün xatiriliniwatqan bolup, b d t herqaysi dölet hökümetliridin mejburiy ghayib qiliwétilgenlerning hoquqini qoghdash ehdinamisini ijra qilishni telep qilip kelgen. 30 ‏-Awghust b d t bash katipi penjiwén yene b d t ning tor békitide mexsus bayanat élan qilip, mejburiy ghayib qiliwétilgenlerning hoquqini qoghdashni telep qilghan.

Xitay xelq'ara taratqularda mejburiy ghayib qiliwétilgenler eng köp döletlerning biri dep teriplenmekte. 2009-Yili ürümchide yüz bergen 5-iyul weqeside saqchilar teripidin tutqun qilinip, kéyin iz-dériki bolmighan köpligen Uyghurlardin 30 din artuq kishi radiyomiz teripidin éniqlan'ghan. Undin bashqa bultur 7-ay mezgilide yüz bergen 300 din artuq adwokatni tutqun qilish weqesidin buyan, xitayda kishilik hoquq pa'aliyetchiliri, erzdarlar we ularning adwokatlirining tuyuqsiz ghayib bolush weqeliri barghanche köpeygen idi.

Toluq bet