Хитайниң хәйку шәһиридә башланғуч мәктәп оқуғучилири пичақлиқ һуҗумға учриди

Мухбиримиз меһрибан
2016-02-29
Елхәт
Пикир
Share
Принт

29- Феврал күни хитайниң хәйку шәһиридә башланғуч мәктәп оқуғучилириға пичақлиқ һуҗум вәқәси йүз берип, аз дегәндә 10 оқуғучи яриланған.

Хоңкоңда иқтисад гезитиниң хәвиридә дейилишичә, вәқә хәйку шәһири луңхуа районидики яңфән башланғуч мәктәп оқуғучилири чүшлүк дәм елишқа чиққан мәзгилдә йүз бәргән.

Шу җай вақти әтигән саәт 11 йерим әтрапида бир әр киши чүшлүк дәм елишни сақлап, узун сәп болуп тизилип турған оқуғучиларға пичақ билән туюқсиз һуҗум қилған, 6 оғул оқуғучи, 4 қиз оқуғучи охшимиған дәриҗидә яриланған. Хоңкоңда иқтисад гезитиниң хәвиридә дейилишичә, вәқәдин кейин сақчилар мәктәпни қамал қилип, қечип кәткән гумандарни тутидиғанлиқини вә гумандарниң немә үчүн оқуғучиларға һуҗум қилишиниң сәвәбини ениқлайдиғанлиқини елан қилған. Иҗтимаий алақә торлиридики учурларда йәнә, сақчиларниң вәқә йүз бәргән мәктәпниң йенидики кочидин бир әрниң өлүкини тепивалғанлиқи, или сиҗүн исимлик 45 яшлиқ бу әрниң өзини өлтүрүвалғанлиқи, әмма униң оқуғучиларға һуҗум қилған гумандар икәнлики яки әмәслики техи бекитилмигәнлики қатарлиқлар тилға елинди.

Хитай вәзийәт анализчилири, хитай һөкүмитиниң хитай пуқралири садир қилған вәқәләрдики һуҗум гумандарлирини көпинчә һалларда «әқлидин азған кишиләр» дәп бекитип, уйғурларниң һөкүмәт сақчилириға қилған һуҗумлирини «террорлуқ вәқәлири» дәп бекитиши диққәт қозғайдиғанлиқини билдүрүп, хитай һөкүмитиниң охшаш һуҗум вәқәлириниң характерини бекитиштә, вәқәдики гумандарниң милләт тәркибигә қарап икки бислиқ өлчәм ишлитиватқанлиқини илгири сүрмәктә.

Пикирләр (0)
Share
Толуқ бәт