Firansiye muxbiri ursula 31- dékabir xitaydin mejburi ayrildi

Muxbirimiz méhriban
2015-12-31
Élxet
Pikir
Share
Print

Xewerlerge qarighanda, Uyghurlargha munasiwetlik maqalisi seweblik xitayning naraziliqini qozghighan firansiye "Lobs" heptilik zhurnilining béyjingda turushluq muxbiri ursula gotiyir xanim 31-dékabir xitaydin ayrilghan.

Ursula gotiyir ayrodromgha méngishtin ilgiri firansiye agéntliqining ziyaritini qobul qilip, "Xitayda muxbirliq qilish kinishkisining uzartilishi ret qilghanliqi üchün, xitaydin ayrilishqa mejbur bolghanliqi" ni bildürgen.

Ursula xanim yene özining béyjingdiki eng axirqi künidiki rohi halitini teswirlep: "Ré'alliqtin halqighan küchlük bir tuyghuda turuptimen, hemme ishlar shundaq heyran qalarliq we téz yüz berdi, bu ré'alliqni adem qobul qilalmaydu" dégen.

Ursula 18-noyabir élan qilghan maqaliside, "18-Séntebir bay weqesi" ning "13-Noyabir parizh térrorluq hujumi" bilen mahiyet jehettin perqlinidighanliqi, mezkur weqening xitay dégendek xelq'ara jihadiy heriketler bilen munasiwetsizlikini körsetkenliki üchün xitay hökümiti xalimaydighan shexske aylan'ghan idi.

Ursula xanim seyshenbe küni firansiye radi'osining ziyaritini qobul qilghinida: "Öz qarishida ching turghanliqi we xitay hökümitidin kechürüm sorashni ret qilghanliqi üchün, xitay tashqi ishlar ministirliqi 25 dékabir uninggha téléfon qilip, 2015-yil 31-dékabirdin qalmay xitaydin ayrilishini uqturghan" liqini bildürgen.

Xitayning firansiye muxbiri ursulani u yazghan xewer seweblik xitaydin qoghlap chiqirishi xelq'ara kishilik hoquq we axbarat erkinlik teshkilatlirining qattiq tenqidige uchrighan. Emma xitay tashqi ishlar ministirliqi özining herikitini aqlap:"Xitay térrorluq chémpiyonlirining erkinlikini hergiz qollimaydu" dégen.

Toluq bet