Хәлқара мухбирлар бирләшмиси хитайниң «телевизорда җинайитигә төвә қилдуруш» программисини тәнқидлиди

Мухбиримиз меһрибан
2016-02-29
Елхәт
Пикир
Share
Принт

Хәлқара мухбирлар бирләшмиси 29-феврал дүшәнбә күни тор бетидә баянат елан қилип, хитайниң «телевизорда җинайитигә төвә қилдуруш» программисини тәнқидлиди.

Баянатта бу қилмишниң хәлқара ахбарат низами вә б д т дә мақулланған хәлқара кишилик һоқуқ әһдинамисигә бузғунчилиқ қилмиши икәнлики тәкитлинип, хитайни инсанниң қәдри қиммити дәпсәндә қилинидиған бу хил «телевизорда гунаһини тонуп төвә қилдуруш» программилирини дәрһал тохтитиш тәләп қилинди.

Америка авазиниң бу һәқтики хәвиридә, мухбирлар бирләшмисиниң баянатидики, «25-феврал күни хитайниң венҗу телевизийә истансиси хитайдики христиан муритлириниң һоқуқини қоғдиғучи адвокат җаң кәйни телевизорда сөзлитип, венҗудики 100 нәччә черкавниң христиан бәлгисини чеқишқа наразилиқ билдүрүш һәрикитидики аталмиш җинайәтлиригә пушайман қилғанлиқи тоғрисида мәхсус программа бәрди. Бу қилмиш хәлқара қанун-низамларда бәлгиләнгән кишилик һоқуқ қануниға хилап болупла қалмастин, бәлки хитай һөкүмити өзи елан қилған хитайдики хәвәр-ахбарат қаидиси, мухбирлар қануниға хилап қилмиш. Биз хитайни бу хил телевизийә программилирини дәрһал тохтитишқа чақиримиз, шуниңдәк б д т кишилик һоқуқ комитетиниң мәхсус тәкшүрүш өмики тәшкилләп, хитайдики ахбарат-пикир әркинлики мәсилисини тәкшүрүшкә чақиримиз» дегән сөзләр нәқил елинған.

Хитайда мәһбусларни зиярәт қилип, уларни телевизорда өз қилмишиға төвә қилдуруш йиллардин буян давам қилмақта. Мәсилән, 2009-йилдики 5-июл үрүмчи вәқәси вә униңдин кейинки қаршилиқ һәрикәтлиридә қолға елинған уйғур сиясий мәһбуслири, тайланд, пакистан қатарлиқ дөләтләрдин хитайға қайтуруп берилгән уйғурлар һәққидиму аталмиш «гунаһиға төвә қилғанлиқи» һәққидә мәхсус телевизийә программилири ишлинип, уйғур районида кәң тәшвиқ қилиниши чәтәлләрдики уйғур тәшкилатлири вә хәлқара кишилик һоқуқ органлири тәрипидин инсан һәқлиригә еғир дәриҗидә хилап қилмиш дәп тәнқидләнгән иди.

Пикирләр (0)
Share
Толуқ бәт