Xelq'ara muxbirlar birleshmisi xitayning "Téléwizorda jinayitige töwe qildurush" programmisini tenqidlidi

Muxbirimiz méhriban
2016-02-29
Élxet
Pikir
Share
Print

Xelq'ara muxbirlar birleshmisi 29-féwral düshenbe küni tor bétide bayanat élan qilip, xitayning "Téléwizorda jinayitige töwe qildurush" programmisini tenqidlidi.

Bayanatta bu qilmishning xelq'ara axbarat nizami we b d t de maqullan'ghan xelq'ara kishilik hoquq ehdinamisige buzghunchiliq qilmishi ikenliki tekitlinip, xitayni insanning qedri qimmiti depsende qilinidighan bu xil "Téléwizorda gunahini tonup töwe qildurush" programmilirini derhal toxtitish telep qilindi.

Amérika awazining bu heqtiki xewiride, muxbirlar birleshmisining bayanatidiki, "25-Féwral küni xitayning wénju téléwiziye istansisi xitaydiki xristi'an muritlirining hoquqini qoghdighuchi adwokat jang keyni téléwizorda sözlitip, wénjudiki 100 nechche chérkawning xristi'an belgisini chéqishqa naraziliq bildürüsh herikitidiki atalmish jinayetlirige pushayman qilghanliqi toghrisida mexsus programma berdi. Bu qilmish xelq'ara qanun-nizamlarda belgilen'gen kishilik hoquq qanunigha xilap bolupla qalmastin, belki xitay hökümiti özi élan qilghan xitaydiki xewer-axbarat qa'idisi, muxbirlar qanunigha xilap qilmish. Biz xitayni bu xil téléwiziye programmilirini derhal toxtitishqa chaqirimiz, shuningdek b d t kishilik hoquq komitétining mexsus tekshürüsh ömiki teshkillep, xitaydiki axbarat-pikir erkinliki mesilisini tekshürüshke chaqirimiz" dégen sözler neqil élin'ghan.

Xitayda mehbuslarni ziyaret qilip, ularni téléwizorda öz qilmishigha töwe qildurush yillardin buyan dawam qilmaqta. Mesilen, 2009-yildiki 5-iyul ürümchi weqesi we uningdin kéyinki qarshiliq heriketliride qolgha élin'ghan Uyghur siyasiy mehbusliri, tayland, pakistan qatarliq döletlerdin xitaygha qayturup bérilgen Uyghurlar heqqidimu atalmish "Gunahigha töwe qilghanliqi" heqqide mexsus téléwiziye programmiliri ishlinip, Uyghur rayonida keng teshwiq qilinishi chet'ellerdiki Uyghur teshkilatliri we xelq'ara kishilik hoquq organliri teripidin insan heqlirige éghir derijide xilap qilmish dep tenqidlen'gen idi.

Toluq bet