Ürümchi intérnét tori uchur ishxanisi yéngi tipliq tajsiman wirus heqqide "Ösek söz" tarqitish bilen eyiblendi

2020-01-28
Élxet
Pikir
Share
Print

"Xitay xewerler tori" ürümchi intérnét tori uchur ishxanisining yéngi tipliq tajsiman wirus heqqide "Ösek söz" tarqatqanliqini ilgiri sürdi.

"Xitay xewerler tori" 27-yanwar küni tarqatqan xewiride, ürümchi sheherlik intérnét tori uchur ishxanisini "26-Küni ürümchi shehiridiki yuqumlinish ehwali heqqide emeliyetke uyghun kelmeydighan xewer tarqatti" dep eyibligen.

Melum bolushiche, ürümchi sheherlik intérnét tori uchur ishxanisi shu küni tarqatqan xewiride "Herqaysi jaylarda topliship yémek yéyish men'i qilinidu. Ashxanilar waqitliq taqaldi", "Ürümchige kirip chiqidighan barliq yoluchi we yük aptomobilliri, taksilar toxtitildi", "Ichkiridin kelgenler ürümchide 14 kün muddet boyiche karantin'gha élinidu" dégenlerni élan qilghan iken.

Biraq "Xitay xewerler tori?" mezkur uchurlarning yalghanliqini, ürümchide hemme orunlarning normal xizmet bériwatqanliqini, ashxanilarning ochuqluqini, aptobuslarning normal qatnawatqanliqini ilgiri sürgen.

2017-Yilidin béri shinjang intérnét tori uchur ishxanisi, ürümchi intérnét tori uchur ishxanisi we shinjang Uyghur aptonom rayonluq j x nazariti qatarliqlar birlikte Uyghur élide nurghun kishini "Intérnét tori supisidin paydilinip, zorawanliq we térrorluq, diniy esebiylik, milliy bölgünchilik, shundaqla pitne-pasat, yalghan uchur tarqitish, ün-sin, yéziq we süret höjjetlirini terghib qilish, saqlash hemde tarqitish" qatarliq jinayetler arqiliq bir terep qilghanidi. Biraq uning bügün xitay xewerler tori teripidin ösek söz tarqitish bilen eyiblinishi küchlük diqqet qozghidi.

Yuqiridiki ehwal, xitay hökümet da'irilirining nöwette "Wuxen wirusi" gha a'it emeliyetni xitay we dunyadiki jama'etchiliktin yoshuruwatqanliqi heqqidiki gumanlarni kücheytken.

Toluq bet