Земистан тори хитай өлкилиридики «шинҗаң синипи» оқуғучилириниң хитайлаштуруш паалийәтлиригә қатнаштурулуватқанлиқини хәвәр қилди

Мухбиримиз ирадә
2020-02-04
Елхәт
Пикир
Share
Принт

Хитай өлкилиридики «шинҗаң синиплири» да оқуватқан уйғур оқуғучиларниң һәрхил меңә ююш вә хитайлаштуруш паалийәтлиригә қатнаштурулуватқанлиқи мәлум.

Мәркизи италийәдики «земистан» тори 1-феврал күни хитайниң җеҗияң өлкисидики техником вә толуқ оттура мәктәпләрдә оқуйдиған, асаслиқи уйғурлардин тәркиб тапқан «шинҗаң синиплири» ниң оқутқучилири билән өткүзүлгән сөһбәт хатирисини елан қилған. Бу сөһбәт хатирилиридә оқутқучилар бирдәк бу оқуғучиларниң сестимилиқ һалдики вәтәнпәрвәрлик, милләтләр иттипақлиқи, компартийә идийәси вә дөләткә болған садақәтмәнликтин ибарәт тәрбийәләшләрдин өткүзүлүдиғанлиқини ейтқан. Кәспий техником оқутқучиси болса бу оқуғучилар ичидики ипадиси көрүнәрлик болғанларниң уйғур райониға қайтурулуп, шу җайдики сақчиханиларда, йезилиқ һөкүмәттә вә қош тил мәктәплиридә хизмәткә чүшүп, өз ролини җари қилдурудиғанлиқини ейтқан. 

Мәлум болушичә, юқири дәриҗилик органлар «шинҗаң синиплири» оқутқучилириға бу оқуғучиларни «вәтәнни сөйидиған қилип тәрбийәләш бир сиясий бурч» дәп тәкитләп турудикән. 

«Земистан» ториниң хәвәр қилишичә, «шинҗаң синиплири» да оқуватқан бу оқуғучилар йәнә оқутқучилири тәрипидин қәрәллик һалда чошқа гөши йийиштин дерәк беридиған «милләтләр иттипақлиқи тамиқи» йийишкә орунлаштурулидиған болуп, бу һәқтә сөз қилған бир оқутқучи «бу дегән һазирқи омумий йүзлиниш, компартийәниң уларни бу йәргә әкилиштики мәқсити уларни хитайлаштуруштин ибарәт» дегән.

Пикирләр (0)
Share
Толуқ бәт