Уйғур елида башланғуч вә оттура мәктәп дәрслирини хитайчә өтүш һәққидә рәсмий һөҗҗәт чиқирилған

Мухбиримиз қутлан
2017-08-07
Елхәт
Пикир
Share
Принт

Алдинқи һәптә хотән вилайәтлик маарип идарисиниң 6-айниң 28-күни чиқирип тарқатқан хотән вилайитиниң маарип системисида уйғур тилини чәкләш һәққидики һөҗҗити рәсмий дәлилләнгән иди.

Хотән даирилириниң вилайәт тәвәсидики уйғур миллий маарипини пүтүнләй хитайлаштуруш һәққидики бу қарари хәлқара таратқуларниң күчлүк диққитини қозғаватқан бир мәзгилдә, уйғур аптоном районлуқ маарип назаритиниң 7-айниң 5-күни чиқирип тарқатқан бир қизил башлиқ рәсмий һөҗҗити ашкариланди.

Мәзкур һөҗҗәткә «аптоном районниң мәҗбурийәт маарипи басқучидики қош тил оқутушиниң дәрслик орунлаштуруш лайиһәси» дәп нам берилгән.

Һөҗҗәтниң биринчи маддисида «2017-йили 9-айниң 1-күнидин етибарән уйғур аптоном районидики башланғуч вә толуқсиз оттура мәктәпләрдә барлиқ дәрсләр ‹дөләтниң ортақ тил-йезиқи' да, йәни хитай тилида өтүлиду, дейилгән. Һөҗҗәттә йәнә мәзкур милләтниң әдәбият дәрслики қошумчә өтүлиду, дейилгән болсиму, әмма униң қайси тилда өтүлидиғанлиқи әскәртилмигән. Униңдин башқа, уйғур елиниң җәнубидики 3 вилайәт, бир областниң вақтинчә шараити һазирланмиған районлирида маарип назаритиниң 2017-йиллиқ 12-вә 13-номурлуқ һөҗҗити бойичә иҗра қилинидиғанлиқи әскәртилгән.

Муһаҗирәттики уйғур көзәткүчиләр билән сиясий паалийәтчиләр бу һәқтә җиддий инкас қайтуруп, бу, хитай һөкүмитиниң уйғур миллий маарипини пүтүнләй хитайлаштуруш пиланиниң рәсмий қизил башлиқ һөҗҗәт арқилиқ оттуриға чиқиши икәнликини тәкитлиди. Улар йәнә, хитай бу һөҗҗәт арқилиқ өзи түзгән «асасий қанун» вә «миллий территорийәлик аптономийә қануни» дики йәрлик милләтләргә бәргән аталмиш «һәқ-һоқуқлири» ни өзи инкар қилди, дегәнләрни илгири сүрмәктә.

Пикирләр (0)
Share
Толуқ бәт