Uyghur élida bashlan'ghuch we ottura mektep derslirini xitayche ötüsh heqqide resmiy höjjet chiqirilghan

Muxbirimiz qutlan
2017-08-07
Élxet
Pikir
Share
Print

Aldinqi hepte xoten wilayetlik ma'arip idarisining 6-ayning 28-küni chiqirip tarqatqan xoten wilayitining ma'arip sistémisida Uyghur tilini cheklesh heqqidiki höjjiti resmiy delillen'gen idi.

Xoten da'irilirining wilayet tewesidiki Uyghur milliy ma'aripini pütünley xitaylashturush heqqidiki bu qarari xelq'ara taratqularning küchlük diqqitini qozghawatqan bir mezgilde, Uyghur aptonom rayonluq ma'arip nazaritining 7-ayning 5-küni chiqirip tarqatqan bir qizil bashliq resmiy höjjiti ashkarilandi.

Mezkur höjjetke "Aptonom rayonning mejburiyet ma'aripi basquchidiki qosh til oqutushining derslik orunlashturush layihesi" dep nam bérilgen.

Höjjetning birinchi maddisida "2017-Yili 9-ayning 1-künidin étibaren Uyghur aptonom rayonidiki bashlan'ghuch we toluqsiz ottura mekteplerde barliq dersler 'döletning ortaq til-yéziqi' da, yeni xitay tilida ötülidu, déyilgen. Höjjette yene mezkur milletning edebiyat dersliki qoshumche ötülidu, déyilgen bolsimu, emma uning qaysi tilda ötülidighanliqi eskertilmigen. Uningdin bashqa, Uyghur élining jenubidiki 3 wilayet, bir oblastning waqtinche shara'iti hazirlanmighan rayonlirida ma'arip nazaritining 2017-yilliq 12-we 13-nomurluq höjjiti boyiche ijra qilinidighanliqi eskertilgen.

Muhajirettiki Uyghur közetküchiler bilen siyasiy pa'aliyetchiler bu heqte jiddiy inkas qayturup, bu, xitay hökümitining Uyghur milliy ma'aripini pütünley xitaylashturush pilanining resmiy qizil bashliq höjjet arqiliq otturigha chiqishi ikenlikini tekitlidi. Ular yene, xitay bu höjjet arqiliq özi tüzgen "Asasiy qanun" we "Milliy térritoriyelik aptonomiye qanuni" diki yerlik milletlerge bergen atalmish "Heq-hoquqliri" ni özi inkar qildi, dégenlerni ilgiri sürmekte.

Toluq bet