Хоңкоңдики даңлиқ бай шав җйәнхуа баянатида өзиниң тутқун қилинғанлиқини рәт қилди

Мухбиримиз меһрибан
2017-01-31
Елхәт
Пикир
Share
Принт

Хоңкоң таратқулириниң хәвәр қилишичә, 30-январ күни хитайдики даңлиқ бай шав җйәнхуа хитай сақчилири вә дөләт бихәтәрлик хадимлиридин тәшкил тапқан 10 нәччә киши тәрипидин хоңкоңда тутқун қилинип хитайға ялап елип кетилгән.

Бу һәқтики хәвәрләрдә йәнә, шав җйәнхуаниң тутқун қилинишиға униң хитай рәиси ши җинпиңни тәнқидлигәнлики сәвәб болған болуши мумкинлики тилға елинған иди. Әмма 31-январ әтигән шав җйәнхуаниң игидарчилиқидики миңтйән һәссидарлиқ ширкитиниң үндидар торида униң имзасида «җәмийәтниң маңа көңүл бөлгинигә рәһмәт. Мән һазир чәтәлдә давалиниватимән, һазирчә әһвалим яхши. Миңтйән ширкитиниң барлиқ хизмәтлири нормал кетиватиду!» дегән сөзләр йезилған баянат елан қилинип, хитай сақчилири тәрипидин тутқун қилинғанлиқи инкар қилинған.

30-январ шав җйәнхуаниң тутқун қилинғанлиқ хәвири тарқалғандин кейин, хоңкоң сақчи даирилири 30-январ түн ниспидә дәсләп баянат берип, униң хоңкоңдики аилисидикиләр сақчиларға униң 30-январ бир бөлүм кишиләр тәрипидин чоң қуруқлуққа елип кетилгәнликини билдүргән болсиму, әмма шу күни кәчтә униң аилисидикиләрниң сақчиға қайта телефон қилип, шав җйәнхуаниң сақ-саламәт икәнликини уқтурғанлиқини, сақчиларниң нөвәттә әһвални давамлиқ тәкшүрүватқанлиқини билдүргән.

Учурлардин мәлум болушичә, бу йил 45 яшқа киргән шав җйәнхуа,канада пуқраси болуп, 89-йили бейҗиң тйәнәнмен оқуғучилар демократик һәрикити мәзгилидә бейҗиң университети оқуғучилар уюшмисиниң рәиси болған вә оқуғучилар билән һөкүмәт оттурисида сүлһ қилишқа қатнашқан. Оқуш пүттүргәндин кейин сода ишлириға киришип, хитайниң көп сандики юқири дәриҗилик һөкүмәт әмәлдарлири билән содида мәнпәәтдарлиқ мунасивити орнатқан. Шәхси байлиқи нәччә йүз милярд хәлқ пулидин ешип, хитайда алдинқи қатардики байлар қатариға өткән. Учурларда йәнә униң, йеқинқи йилларда хитай рәиси ши җинпиңға қарши гуруһтики әмәлдарлар билән қоюқ мунасивәттә болғини үчүн, хитай интизам тәкшүрүш комитетиниң униң пейиға чүшкәнлики қатарлиқ әһвалларму тилға елинған.

Пикирләр (0)
Share
Толуқ бәт