Xongkongdiki mingpaw gézitining sabiq tehririning pichaqlinishi xongkongluqlarni qattiq narazi qildi

Muxbirimiz irade
2014-02-27
Élxet
Pikir
Share
Print

Xongkongda chiqidighan mingpaw gézitining béyjing hökümitini tenqid qilish bilen tonulghan tehriri charshenbe küni etigende pichaqliq hujumgha uchrap éghir yarilan'ghan.

Bu weqe xongkongdiki axbarat erkinlikining chékinishige bolghan naraziliqni téximu ulghaytiwetti. Kéwin lawgha hujum qilish weqesi kündüz waqti yüz bergen bolsimu, hazirghiche birer shahit téxi otturigha chiqmighan. Xongkong saqchiliri jinayet sewebini éniq békitmigen, emma bir qisim yerlik gézitlerning xewer qilishiche, xongkong saqchiliri jinayet meydanidiki tekshürüshlerdin jinayetning kéwen lawni öltürüshni emes, belki uni qorqutush, heywe qilish meqsiti bilen ishlen'gen bolush éhtimalliqining yuqiriliqini éytqan.

Kéwin law ötken charshenbe küni tuyuqsiz wezipisidin élip tashlinip, uning ornigha xitaygha yéqin dep qarilidighan bir tehrir qoyulghan. Yekshenbe küni xongkongda minglighan kishi hökümet binasi aldigha yighilip namayish qilip, xongkong axbaratida chong quruqluq hökümiti tesirining éship ketkenlikige naraziliq bildürgende, del mingpaw gézitining tehriri kéwin lawning wezipisidin élip tashlinishighimu naraziliq bildürgen idi. Weqening mana bu namayishtin kéyinla yüz bérishi mezkur hujumning kéwin lawgha shexsi öch sewebidin emes, belki axbarat erkinlikining simwoli bolghanliqi üchün qilin'ghanliqi heqqidiki gumanlarni ashurghan. Muhapizetchi gézitining xewer qilishiche, bügün mingpaw gézitining xizmetchiliri hemmisi qara renglik kiyim kiyip wehshiylerche qilin'ghan hujumni eyibligen. Muxbirlarni qoghdash jem'iyitining xongkong ishxanisi weqeni qattiq eyibligen. Xongkong zhurnalistlar uyushmisimu yekshenbe küni yene namayish uyushturidighanliqini jakarlighan.

Xongkong en'gliyedin qayturuwélin'ghanda xongkongluqlargha "Bir dölette ikki xil tüzüm" wede qilin'ghan, emma xongkongluqlar erkinlikining künsayin ilgirilep qamal qiliniwatqanliqidin shikayet qilmaqta. Derweqe, chégrasiz muxbirlar teshkilatining doklatliridin qarighanda, xongkong axbarat erkinliki boyiche 2002-yili dunyada 18-orunda turghan bolsa, 2014-yiligha kelgende bolsa keynige chékinip 61-orun'gha chüshüp qalghan.

Toluq bet