Xitay hökümiti xongkong namayishchilirini "Térrorluq" qa baghlap eyibleshke bashlidi

Muxbirimiz erkin
2019-08-12
Élxet
Pikir
Share
Print

Xitay hökümiti xongkongluqlarning "Qachqunlarni ötküzüp bérish qanuni" gha qarshi qozghighan naraziliq heriketlirini "Térrorluq" qa baghlashqa bashlighan.

Bu yil 7‏-ayning bashlirida partlighan naraziliq namayishida hökümet namayishchilarning "Qachqunlarni ötküzüp bérish qanun layihesi" ni bikar qilish, saqchilarning zorawanliq qilmishini tekshürüsh qatarliq 5 türlük telipige jawab bermigen. Eksiche saqchilarni ishqa sélip, namayishchilarni basturushi namayishning toqunushqa aylinishini keltürüp chiqarghan. Buningda béyjing hökümiti xongkong waliysining namayishchilargha küch ishlitishini qollap kelgen idi.

B b s ning xewer qilishiche, xitayning xongkong-makaw ishxanisi 12‏-awghust küni bayanat élan qilip, namayishchilarning herikitining "Éghir zorawanliq jinayiti shekillendürüsh" ke we "Térrorluqning bash kötürüsh" ke bashlighanliqini bildürgen. Bu Uyghur rayonidiki naraziliq heriketlirini izchil "Térrorluq" qa baghlap basturup kéliwatqan xitay hökümitining Uyghur rayonining sirtida yüz bergen bir naraziliq herikitini tunji qétim "Térrorluq" qa baghlishidur.

Bezi közetküchilerning qarishiche, xitay hökümiti namayishni "Térrorluq" qa baghlap, namayishchilarni qoralliq basturushning bahanisini izdimekte iken. Xongkong‏-makaw ishxanisining bayanatchisi yuqiriqi sözlerni 11‏-awghust küni namayishchilar bilen saqchilar otturisida yüz bergen toqunushqa qarita éytqan. Yekshenbe künidiki toqunushta bezi saqchilarning köyüp yarilan'ghanliqi ilgiri sürülgen idi. Xongkong parlaméntidiki démokratlar guruhining rehbiri maw mingjing xitay terepning bayanatigha inkas bildürüp, tünügünki toqunushta "Puqralardiki ashqunluq" ni saqchilarning zorawanliqi keltürüp chiqarghanliqini bildürgen. Melum bolushiche, düshenbe küni minglighan namayishchi xongkong xelq'ara ayrodromigha toplinip, saqchilarning zorawanliqigha naraziliq bildürgen. Xongkong hökümiti shu küni pütün ayropilan qatnishini bikar qilip, yoluchilarning ayrodromni derhal boshitishini telep qilghan.

Toluq bet