Хоңкоңда намайишлар қайтидин баш көтүрди, сақчилар 12 кишини тутқун қилди

Мухбиримиз ирадә
2014-12-25
Елхәт
Пикир
Share
Принт

Хоңкоң сақчи даирилири пәйшәнбә күни 12 намайишчини тутқун қилған. Бирләшмә агентлиқиниң хәвәр қилишичә, хоңкоңда 3 айға йеқин вақит давам қилған намайиш өткән һәптиләрдә сақчилар тәрипидин мәҗбурий һалда аяғлаштурулған болсиму, бирақ пәйшәнбә күни бир қисим намайишчилар қайтидин моңкок райониға келип намайиш қилип, мәйданни игилимәкчи болған. Сақчилар намайишчиларни тарқақлаштуруш үчүн уларға көз яшартқучи бомба атқан вә 12 нәпирини тутқун қилған. Келип чиққан тоқунушта икки нәпәр сақчиму яриланған.

Хоңкоңда нәччә он миңлиған оқуғучи өткән айларда бейҗиң мәркизи һөкүмитиниң хоңкоң валийси намзатлирини бәлгиләп беридиғанлиқиға қарши чиқип, намайиш қилған. Улар 2017-йилидики сайламда хоңкоңлуқларниң өз валийсини өзи сайлап чиқиш тәлипини оттуриға қоюп, һөкүмәт билән сөзлишишни тәләп қилған. Бирақ, уларниң бу тәлипи җавабсиз қалдурулди. Сақчи даирилири 15-декабир күни барлиқ чедирларни тазилап, намайишни мәҗбурий аяғлаштурған иди.

Пикирләр (0)
Share
Толуқ бәт