Японийә, ши җинпиңниң параттики нутқидин әпсусланғанлиқини билдүрди

Мухбиримиз ирадә
2015-09-03
Елхәт
Пикир
Share
Принт


Японийә һөкүмәт баянатчиси йоши хиде суга пәйшәнбә күни мухбирларға қилған сөзидә, бейҗиңдики һәрбий паратта, японийә - хитай мунасивәтлириниң иҗабий тәрәққиятлириниң гәвдиләндүрүлмигәнликидин әпсусланғанлиқини билдүргән. У мундақ дегән : «биз парат алдида хитай тәрәпни әскәртип, паратта японийигә қарши кәйпият яритилип қалмаслиқиға капаләтлик қилишни, буниң орниға икки дөләт мунасивәтлириниң кейинки йиллардики тәрәққиятиниң йорутулушини тәләп қилған идуқ. Әпсуски, ши җинпиңниң нутқида бундақ бир мәзмун йоқ иди. Биз буниңдин әпсусландуқ.»

Һөкүмәт баянатчиси йоши хиде суга сөзидә йәнә, бирләшкән дөләтләр тәшкилати баш секритари бан кимунниң бейҗиңдики паратқа қатнишишиниму битәрәп мәйданда турмиғанлиқ, дәп тәнқид қилған. У сөзидә йәнә, хитай һөкүмитиниң һәрбий күчиниң зорийиватқанлиқини тилға елип, хитай һәрбий қудритигә аит мәлуматларда һәм шундақла бу нөвәт қисқартилидиғанлиқи елан қилинған һәрбий хадимлар мәсилисидә очуқ - ашкара болуши керәк, дәп әскәрткән.

Чәтәлләрдики бир қисим көзәткүчиләрму хитай һөкүмитиниң японийиниң 70 йилдин буян асияниң тинч тәрәққиятиға вә дуня тинчлиқиға қошқан төһписини көрмәскә селип, униң орниға японийигә қарши өчмәнлик туйғусини күчләндүридиған тәшвиқатларни қилғанлиқини тәнқид қилған иди.

Пикирләр (0)
Share
Толуқ бәт