Японийә министирлири ясукуни қәбригаһини зиярәт қилип хитайни йәнә биарам қилди

Мухбиримиз ирадә
2015-04-23
Елхәт
Пикир
Share
Принт

Японийә дөләт кабинтиниң үч министири пәйшәнбә күни ясукуни қәбригаһини зиярәт қилғандин кейин хитай буниңға дәрһал наразилиқ билдүрди. Хитай ташқи ишлар министирлиқиниң баянатчиси хуң лей бу зиярәтни «тарихқа тутулған хата позитсийә» дәп атиған.

Бирләшмә агентлиқиниң хәвәр қилишичә, қәбригаһни зиярәт қилған министирлардин бири болған апәткә қарши туруш вә контрол қилиш министири харико аримура мухбирларға қилған сөзидә «мән пәқәт өз вәтини үчүн күрәш қилип, җенини пида қилғанларға һөрмитимни вә миннәтдарлиқимни билдүрдүм» дегән.

Бу үч министирниң ясукуниға қилған зиярити чаршәнбә күни хитай дөләт рәиси ши җинпиң билән японийә баш вәзири шинзо абе һиндонезийәдә учрашқандин бир күн кейин елип берилған иди. Хитайниң шинхуа агентлиқи икки дөләт рәһбириниң учришиши җәрянида ши җинпиңниң японийәни тарихиға тоғра муамилә қилишқа чақирғанлиқини хәвәр қилған. Әмма шинзо абе һиндонезийәдики сөзидә бу мәсилидики позитсийисини өзгәртидиғанлиқиға аит һечнемә демигән.

Шинзо абениң йәкшәнбә күни америкиға қилидиған рәсмий зиярити дәл иккинчи дуня урушиниң 70 йиллиқ хатирә мәзгилигә тоғра келидиған болуп, көзәткүчиләр буниң америка-японийә мунасивәтлирини күчәйтиш йолидики муһим бир зиярәт болидиғанлиқини мөлчәрлимәктә.

Пикирләр (0)
Share
Толуқ бәт