«явропа йәһуди ахбарати» 26-ноябир мақалә елан қилип, явропани хитайниң уйғурларни дәпсәндә қилишиға қарши тәдбир елишқа чақирған. «явропа хитайниң уйғурларға қаратқан кишилик һоқуқ дәпсәндичиликигә қандақ инкас қайтуруши керәк» мавзулуқ бу мақалини «явропа йәһуди ахбарати» намлиқ мәзкур хәвәрләр агентлиқиниң баш муһәррири йосси ләмпкович қәләмгә алған.
Мақалидә белгийә парламент әзалириниң сөзидин нәқил кәлтүрүп илгири сүрүшичә, явропа хитайниң уйғур илида тәкшүрүш елип бериш тәклипини қобул қилипла қалмай, бәлки уйғурларниң кишилик һоқуқни дәпсәндә қиливатқан хитай әмәлдарлириға имбарго йүргүзүши, шундақла хәлқара җинайи ишлар сот мәһкимисини ишқа селиши керәк икән. Йосси ләмпкович белгийә йешиллар партийәси парламент әзаси самуел коголатиниң «җиддий әндишә қиливатимиз, дәп қоюш йитәрлик әмәс», «конкирет тәдбирләрни елиш керәк» дегән сөзлирини алаһидә тилға алған.
Йосси ләмпкович самуел коголатиниң шинҗаңдики қул ишчилар әмгикидин пайда еливатқан хитай аппаратлирини вә ширкәтлирини қара тизимликкә елишни, бу мәсилини хәлқара җинайи ишлар сотиға елип беришни тәләп қилғанлиқини тәкитләп, хитай хәлқара җинайи ишлар сотиниң әзаси болмисиму, «лекин җинайәт ишләнсә униң сотлаш һоқуқи бар. Уйғур хәлқиғә қарши ишләнгән җинайәтни җавапкарлиққа тартишниң қануни йоли бар,» дегән.
