"Yawropa yehudi axbarati" 26-noyabir maqale élan qilip, yawropani xitayning Uyghurlarni depsende qilishigha qarshi tedbir élishqa chaqirghan. "Yawropa xitayning Uyghurlargha qaratqan kishilik hoquq depsendichilikige qandaq inkas qayturushi kérek" mawzuluq bu maqalini "Yawropa yehudi axbarati" namliq mezkur xewerler agéntliqining bash muherriri yossi lempkowich qelemge alghan.
Maqalide bélgiye parlamént ezalirining sözidin neqil keltürüp ilgiri sürüshiche, yawropa xitayning Uyghur ilida tekshürüsh élip bérish teklipini qobul qilipla qalmay, belki Uyghurlarning kishilik hoquqni depsende qiliwatqan xitay emeldarlirigha imbargo yürgüzüshi, shundaqla xelq'ara jinayi ishlar sot mehkimisini ishqa sélishi kérek iken. Yossi lempkowich bélgiye yéshillar partiyesi parlamént ezasi samu'él kogolatining "Jiddiy endishe qiliwatimiz, dep qoyush yiterlik emes", "Konkirét tedbirlerni élish kérek" dégen sözlirini alahide tilgha alghan.
Yossi lempkowich samu'él kogolatining shinjangdiki qul ishchilar emgikidin payda éliwatqan xitay apparatlirini we shirketlirini qara tizimlikke élishni, bu mesilini xelq'ara jinayi ishlar sotigha élip bérishni telep qilghanliqini tekitlep, xitay xelq'ara jinayi ishlar sotining ezasi bolmisimu, "Lékin jinayet ishlense uning sotlash hoquqi bar. Uyghur xelqighe qarshi ishlen'gen jinayetni jawapkarliqqa tartishning qanuni yoli bar," dégen.
