«Йәр шари вақти гезити» баш мақалә елан қилип америка мәтбуатлириға һуҗум қилди

Мухбиримиз ирадә
2018-12-27
Елхәт
Пикир
Share
Принт

«Йәр шари вақти гезити» хитай компартийәсиниң орган гезити болған «хәлқ гезити» ниң хәлқара нәшридур. Мәзкур гезит бүгүн баш мақалә елан қилип, хитай һөкүмитиниң уйғур елигә қаратқан сиясәтлирини паш қилған америка мәтбуатлириға һуҗум қилди.

«Йәр шари вақти гезити» баш мақалисидә тиғ учини америка таратқулириға қаратқан. Йәни америка таратқулирида елан қилиниватқан хитайниң уйғур елидики лагер түзүмини нөвәттә ниңшия қатарлиқ туңган мусулманлири зич олтурақлашқан җайларға кеңәйтиватқанлиқи һәққидики хәвәрләрни «пакитни бурмилиған» дәп тәқит қилған.

Йеқинда америкиниң «вол-ситрет журнили» гезити хитай һөкүмитиниң уйғур диярида зор күч билән омумлаштурған тәқиб системиси, тутуп туруш системиси вә мусулманларни ассимилятсийә қилип еритиш чарилирини нөвәттә ниңшя, гәнсу қатарлиқ җайларға көчүрүп омумлаштуруватқанлиқини хәвәр қилған иди.

Хәвәрдә ниңшя, гәнсу қатарлиқ өлкә вә аптоном районлардики сақчиларниң уйғур дияридики «кәспий тәрбийәләш мәктипи» намидики лагерларни вә шуниңдәк «хәлққә қулайлиқ сақчи понкитлири» ни зиярәт қилип тәҗрибә өгиниватқанлиқи, буниң нәтиҗисидә өткән айда чиңхәйниң голмуд шәһиридә 13 орунда «хәлққә қулайлиқ сақчи понкити» қурулуп ишқа кириштүрүлгәнликини баян қилинған. Бу һәқтә елан қилинған анализ вә мулаһизиләрдә уйғур елидики лагерларниң әмдиликтә туңганлар районидиму омумлишиши мумкинлики кәң муназирә қилинған иди.

Һалбуки, «йәршари вақти гезити» ниң баш мақалисидә хитай һөкүмитиниң уйғур елидики сиясәтлириниң «аҗайип даналиқи» көккә көтүрүлүп, уни башқа өлкиләр, һәтта дунядики башқа дөләтләрниңму үлгә елиши керәкликини илгири сүргән, америка вә ғәрб әллириниң мәтбуатлирини «бир тәрәплимилик билән хәвәр тарқатти» дәп әйиблигән.

Пикирләр (0)
Share
Толуқ бәт