Xitay Uyghur élida namrat kentlergiche yuqiri sür'etlik intérnét tori omumlashturmaqchi

Muxbirimiz irade
2018-03-30
Élxet
Pikir
Share
Print

Uyghur rayonidiki axbarat wasitiliri yéqindin buyan Uyghur élida intérnét torini omumlashturush xizmitining kücheytiliwatqanliqini xewer qilmaqta. "Tengritagh tori" ning bu heqtiki xewiride éytilishiche, Uyghur élida yéza-kent rayonliri, bolupmu namrat yéza-kent rayonlirida keng belwaghliq tor omumlashturulidiken.

Uningda éytilishiche, nöwette Uyghur élida sinaq nuqtisi qilin'ghan 2819 memuriy kentni optik talaliq tor bilen qaplash xizmiti tamamlan'ghan. Bu yil dawamliq üchinchi türkümdiki sinaq nuqtisi qilin'ghan 3516 memuriy kentni optik talaliq tor bilen qaplash qurulushi tamamlinidiken we tedrijiy halda 1962 namrat kent pütünley optik talaliq tor bilen qaplinip, tor sür'iti pewqul'adde özleshtürülidiken. 

Téxi yéqinda Uyghur aptonom rayonluq tor we uchur bashqurush ishxanisi uqturush tarqitip, 1-mart künidin étibaren torda we ündidar qatarliq alaqe wastilirida 9 xil témidiki uchurlarni chekligen idi.

Uqturushta siyasiy sezgürlüki bar témilarni, yalghan-yawidaq sözlerni, ichki matériyallarni, zeherlik yaki sériq mezmundiki matériyallarni, xongkong we awmén weziyitige munasiwetlik xewerlerni, herbiy matériyallar we uchurlarni, dölet mexpiyetlikige bérip taqilidighan matériyallarni, dini étiqad heqqidiki munaziriler, milletler ittipaqliqigha tesir yetküzidighan gep-sözler hemde chüshiniksiz ulanmilarni tarqatmasliq yaki torgha yollimasliq telep qilin'ghan. 

1-Mart künidin étibaren yolgha qoyulghan bu maddilargha xilapliq qilghanlarning 8 yilghiche bolghan qamaq jazasi bilen jazalinidighanliqi eskertilgen. 

Chet'ellerdiki Uyghur közetküchiler, xitay hökümitining bir yaqtin Uyghur élida intérnét tor betliri we intérnét qollan'ghuchilirigha qattiq zerbe bérip, yene bir yaqtin torning qaplash da'irisi we sür'itini ashurmaqchi bolushini xelq'araning közini boyash, dep qarimaqta. Ular yene xitayda féysbuk, twittér, watsap, yuwtup qatarliq dunyagha omumlashqan tor betler we epler cheklen'gen bir ehwalda hemme yerni tor bilen qaplashning ziddiyetlik bir ish ikenlikini tekitlimekte.

Toluq bet